Наста Лойка (Анастасія Юр'еўна Лойка) — праваабаронца, была затрымана 28 кастрычніка 2022 года. Да гэтага яна адбывала 30 сутак паводле двух іншых адміністрацыйных арыштаў. Пасля затрымання з'явілася "пакаяльнае відэа", дзе Наста "прызнаецца" ў тым, што нібыта "атрымоўвала фінансаванне ад замежных арганізацый". 

На наступны дзень пасля затрымання ёй прысудзілі арышт у 15 сутак па арт. 19.1 КаАП (Дробнае хуліганства). Пасля заканчэння арышту Наста на волю не выйшла, і яе ізноў асудзілі за "дробнае хуліганства" на 15 сутак. 29 лістапада праваабаронцу яшчэ раз асудзілі на 15 сутак. 14 снежня яе арыштавалі ізноў — чацвёрты раз запар.

На волі Насту чакае пёс Эрык.

Наста — лаўрэатка Прэміі праваабарончай супольнасці Беларусі за 2022 год у намінацыі "Праваабаронца года".

Камітэт ААН па правах чалавека 17 снежня зарэгістраваў скаргу Насты Лойкі. Пакуль справа знаходзіцца на разглядзе ў Камітэце, дзяржава абавязана даць праваабаронцы неадкладны доступ да незалежнай меддапамогі, а таксама забяспечыць захаванасць яе жыцця і здароўя — фізічнага і ментальнага, у тым ліку з дапамогай прадастаўлення прыдатнага для сезону адзення.

Напрыканцы снежня палітзняволенай праваабаронцы выставілі абвінавачванне паводле двух артыкулаў: вядома, што адзін з іх — арт. 342 КК. Насту перавялі ў СІЗА-1.

Паводле інфармацыі Human Constanta, на судзе Наста заявіла, што падчас арышту яе двойчы адводзілі на гутаркі з супрацоўнікамі ГУБАЗіКу, дзе адзін раз яе ударылі электрашокерам, а 11 лістапада адзін з супрацоўнікаў ЦІП вывеў яе ва ўнутраны двор і пакінуў без вопраткі на 8 гадзін. Наста моцна захварэла. За ўвесь гэты час на Акрэсціна атрымалася перадаць лекі, аднак ёсць інфармацыя, што яны так і не дашлі да Насты. Яна па-ранейшаму знаходзіцца ў зняволенні без цёплых рэчаў і сродкаў асабістай гігіены.

У сярэдзіне лютага 2023 г. стала вядома, што Насту таксама абвінавачваюць паводле ч. 3 арт. 130 КК (распальванне расавай, нацыянальнай, рэлігійнай ці іншай сацыяльнай варожасці і варажнечы). Падставай для гэтага зрабіўся нібыта ўдзел праваабаронцы ў напісанні справаздачы аб пераследзе анархісцкай супольнасці ў Беларусі за 2018 год: у дакладзе даецца крытычная ацэнка дзейнасці супрацоўнікаў міліцыі.

Лойка за кратамі пакутуе ад праблемаў са страўнікам: яна веганка і таму можа есці толькі тое, што атрымлівае з волі праз перадачы і што можна набыць у краме СІЗА. Забяспечыць паўнавартаснае харчаванне не ўдаецца. Таксама Насце трэба палячыць зубы, аднак стаматолага, якога для яе знайшлі блізкія, не прапусціў СК.

Судовы працэс над праваабаронцай пачаўся 13 чэрвеня 2023 г у Мінскім гарадскім судзе. Справу разглядае суддзя Алена Шылько, дзяржаўнае абвінавачванне падтрымлівае Вольга Дзіндзелевіч. Амаль напачатку судовага пасяджэння працэс зрабілі закрытым, таму падрабязнасці крымінальнай справы і пазіцыя Насты невядомыя.

У Мінскім гарадскім судзе 20 чэрвеня 2023 г. вынеслі прысуд па справе палітзняволенай праваабаронцы Насты Лойкі: ёй прызначылі сем гадоў калоніі ва ўмовах агульнага рэжыму. Наста заявіла, што будзе абскарджваць прысуд.

3 кастрычніка 2023 г. адбыўся разгляд апеляцыйнай скаргі Насты Лойкі ў Вярхоўным судзе. Судовая калегія пад старшынствам суддзі Пятра Лістраценкі пакінула прысуд без зменаў, а скаргу — без задавальнення. Хутка Насту перавядуць у калонію.

12 кастрычніка 2023 г. КДБ унёс Насту ў "спіс тэрарыстаў". 

23 кастрычніка 2023 г. стала вядома, што Насту перавялі ў ПК-4.

3 лістапада 2023 г. унесена МУС у "спіс экстрэмістаў".

Вясной 2024 г. ад крыніцы "Радыё Свабода" стала вядома, што Наста не задаволеная станам свайго здароўя, але "скардзіцца яна не мае звычкі". Яна працягвае чытаць шмат мастацкай і гістарычнай літаратуры. "Кажа, што збольшага ў яе ўсё нармальна: працуе на пашыве адзення, шмат чытае. Апошняя прачытаная кніга — „Крыжакі“ Генрыка Сянкевіча. Сказала, што кніга, у якой вядзецца пра часы Грунвальдскай бітвы, падаравала ёй новыя веды і цікавыя вобразы, што вельмі карысна, бо інфармацыі з волі ў яе мала. Але з гэтым нічога не зробіш, даводзіцца ёй трываць".

Напрыканцы верасня 2024 г. стала вядома, што Насту этапуюць у мінскае СІЗА, для ўдзелу ў судзе над актывісткамі, якіх вінавацяць паводле палітычных артыкулаў Крымінальнага кодэксу.

Па стане на сярэдзіну кастрычніка 2024 г. мусіла вярнуцца ў ПК № 4. 

Палітзняволенай Насце Лойцы пакінулі прысуд без зменаў

Вярхоўны суд 3 кастрычніка разглядзеў апеляцыйную скаргу праваабаронцы. Судовая калегія пад старшынствам суддзі Пятра Лістраценкі пакінула прысуд без зменаў, а скаргу — без задавальнення. Хутка яе перавядуць у калонію.

Front Line Defenders асудзіў рашэнне пакінуць прысуд Насце Лойцы ў сіле і запатрабаваў вызвалення праваабаронцы

Міжнародная праваабарончая арганізацыя Front Line Defenders асудзіла рашэнне Вярхоўнага суда Беларусі пакінуць у сіле сямігадовы турэмны прысуд праваабаронцы Насце Лойцы і выказала сваю сур'ёзную занепакоенасць сістэматычным жорсткім абыходжаннем і парушэннямі правоў актывісткі цягам яе ўтрымання пад вартай.

Палітзняволеная праваабаронца Наста Лойка стала "Выбітнай выпускніцай" ЕГУ

Трэці год запар узнагарода прызначаецца палітзняволеным.

Праваабаронцы Насце Лойцы прызначылі 7 гадоў калоніі

Распачаўся суд над праваабаронцай Настай Лойкай. Працэс зрабілі закрытым

Праваабаронцы пагражае да 12 гадоў калоніі. Справу разглядае суддзя Алена Шылько, дзяржаўнае абвінавачванне падтрымлівае Вольга Дзіндзелевіч.

Названыя лаўрэаты Прэміі праваабарончай супольнасці Беларусі за 2022 год

На ўрачыстай цырымоніі ў Беларускім доме правоў чалавека імя Барыса Звоскава ў Вільні 11 студзеня абвясцілі лаўрэатаў Прэміі праваабарончай супольнасці Беларусі за 2022 год. Імі сталі праваабаронца Наста Лойка, журналістка Аксана Колб і Міжнародны камітэт па расследаванні катаванняў.