Алесь (Аляксандр) Яўгенавіч Сабалеўскі – былы магілёўскі блогер і журналіст, які супрацоўнічаў з шэрагам незалежных рэгіянальных выданняў. У 2020 годзе яго неаднаразова затрымлівалі за журналісцкую дзейнасць.

Быў затрыманы 12 снежня 2023 года ў Магілёве. На наступны дзень суд Кастрычніцкага раёна Магілёва прызначыў Алесю 10 сутак адміністрацыйнага арышту. Прычына затрымання і артыкул, паводле якога яго судзілі, невядомыя. Пасля адбыцця арышту Сабалеўскі не выйшаў на волю з ІЧУ, бо на яго быў складзены новы адміністрацыйны пратакол паводле артыкула 19.11 КаАП (распаўсюд экстрэмісцкіх матэрыялаў). Пасля стала вядома, што Алеся перавялі ў следчы ізалятар турмы № 4 Магілёва і на яго заведзена крымінальная справа.

Паводле інфармацыі праваабаронцаў, крымінальны пераслед Алеся Сабалеўскага можа быць звязаны з прызнаннем экстрэмісцкімі фармаваннямі рэгіянальных медыярэсурсаў: YouTube-канала 6TV Belarus, інфармацыйнага сайт «Магілёў. Media» («Навіны Магілёўскага рэгіёну»).

Алесю інкрымінуюць "удзел грамадзяніна Рэспублікі Беларусь у баявых дзеяннях на тэрыторыі замежнай дзяржавы без упаўнаважання дзяржавай" (ч. 1 арт. 361-3 КК), "стварэнне экстрэмісцкага фармавання" (ч. 1 арт. 361-1 КК) і "ўдзел у экстрэмісцкім фармаванні" (ч. 3 арт. 361-1 КК).

Разгляд справы пачаўся 12 ліпеня 2024 г. у Магілёўскім абласным судзе. Працэс вёў суддзя Дзмітрый Крэнжыеўскі, які прызначыў 31 ліпеня Алесю 4 гады калоніі агульнага рэжыма, а таксама штраф у 200 базавых велічыняў. 

27 верасня 2024 г. у Алеся ў Вярхоўным судзе адбыўся разгляд апеляцыйнай скаргі. Старшыня судовай калегіі Максім Філатаў.

11 кастрычніка 2024 г. МУС дадала Алеся ў "спіс экстрэмістаў".

Утрымліваўся ў турме № 4, актуальны адрас невядомы. 

Палітзняволеных журналістаў з Магілёва асудзілі да калоніі

У Магілёўскім абласным судзе 31 ліпеня вынеслі прысуд былым журналістам Алесю Сабалеўскаму і Яўгену Глушкову паводле двух артыкулаў Крымінальнага кодэкса: ч. 1 і ч. 3 арт. 361-1 (стварэнне экстрэмісцкага фармавання або ўдзел у ім), ч. 1 арт. 361-3 (удзел ці падрыхтоўка грамадзяніна Рэспублікі Беларусь на тэрыторыі замежнай дзяржавы ў ваенных дзеяннях без упаўнаважання дзяржавы).