Вячаслаў Мікалаевіч Папоў — жыхар Мінска, затрыманы 10 сакавіка 2021 года ў сябе дома. Дачакаўшыся, пакуль бацькі Вячаслава з’едуць, сілавікі ўзламалі дзверы ў кватэры, паклалі хлопца на падлогу і разбілі ўвесь твар. У кватэры быў праведзены ператрус, на які бацькоў не пусцілі.

Вячаславу прад’яўлена абвінавачванне па артыкуле 342 Крымінальнага кодэксу (Арганізацыя альбо актыўны ўдзел у групавых дзеяннях, якія груба парушаюць грамадскі парадак) па падзеях 9-10 жніўня ў Мінску. 10 ліпеня 2021 Вячаславу прызначылі тры гады "хіміі".

У ліпені 2021 пачаў адбываць пакаранне ў ПУАТ № 26, у канцы студзеня 2022 быў пераведзены ў ПУАТ № 24.

9 чэрвеня 2022 у судзе Кастрычніцкага раёна Гродна адбыўся суд па замене рэжыму адбывання пакарання: суддзя Віталь Лабоцкі пастанавіў перавесці Вячаслава ў калонію на 9 месяцаў і 11 дзён.

Утрымліваўся ў гродзенскай Турме № 1, пасля быў этапаваны ў ПК № 22.

Палітвязень цалкам адбыў тэрмін і ў сярэдзіне сакавіка 2023 г. выйшаў на волю.

Палітвязня Вячаслава Папова асудзілі на тры гады "хіміі" за ўдзел у жнівеньскіх акцыях пратэсту

У судзе Ленінскага раёна разгледжаная крымінальная справа ў дачыненні да Вячаслава Папова, якога абвінавачвалі ў актыўным удзеле ў групавых дзеяннях, якія груба парушаюць грамадскі парадак.