Вячаслаў Мікалаевіч Арэстаў — спецыяліст па абслугоўванні карпаратыўных кліентаў у банку. Ён быў затрыманы ў траўні 2022 года ў межах крымінальнай справы аб групавых дзеяннях, якія груба парушаюць грамадскі парадак (ч. 1 арт. 342 Крымінальнага кодэксу), за ўдзел у акцыях пратэсту ў жніўні 2020 года.

На пачатку чэрвеня 2022 г. Вячаслава перавялі з ІЧУ на Акрэсціна ў СІЗА-1.

У верасні адбыўся разгляд справы. Вячаслаў на судзе віну прызнаў і пацвердзіў, што публічна выкрыкваў лозунгі, а таксама блакаваў рух транспарту, бо разам з іншымі людзьмі выходзіў на палосы руху праезнай часткі. Паводле хлопца, ён зрабіў гэта "паддаўшыся ўплыву заклікаў, якія змяшчаюцца на розных сайтах, каналах у інтэрнэце".

23 верасня 2022 г. суддзя Савецкага раёна Аляксандр Волк прызначыў палітвязню тры гады "хатняй хіміі". Вячаслава вызвалілі ў зале суда.