Віталь Віктаравіч Лойка — жыхар Салігорску, быў затрыманы па крымінальнай справе, узбуджанай за каментары ў інтэрнэце пасля гібелі ў мінскай кватэры супрацоўніка КДБ Дзмітрыя Федасюка і it-спецыяліста Андрэя Зельцэра. 

Вядома, што Віталь праходзіць па крымінальнай справе па артыкулах 369 КК (Абраза прадстаўніка ўлады) і 130 КК (Распальванне сацыяльнай варожасці). 

Спярша знаходзіўся ў ІЧУ на Акрэсціна, пасля быў пераведзены ў жодзінскую Следчую турму № 8. Да суда ўтрымліваўся ў СІЗА-1.

20 чэрвеня 2022 г. КДБ унёс палітвязня ў "спіс асобаў, датычных да тэрарыстычнай дзейнасці". 

У Мінскім абласным судзе 13 ліпеня 2022 г. палітвязня асудзілі да двух гадоў калоніі і штрафу ў памеры 100 базавых велічыняў (3 200 беларускіх рублёў). Такі прысуд вынесла суддзя Алена Міснік.

На пачатку жніўня 2022 г. Віталя этапавалі з СІЗА-1 у магілёўскую Турму № 4. Ад 12 кастрычніка палітвязень адбывае пакаранне ў шклоўскай калоніі № 17.

29 сакавіка 2023 г. палітвязень выйшаў на волю, цалкам адбыўшы тэрмін.

"Пора выносить мусор" — за такі каментар палітвязня асудзілі па "справе Зельцэра" да двух гадоў калоніі

Згодна з версіяй абвінавачвання, Віталь Лойка 29 верасня 2021 года са свайго мабільнага тэлефона размясціў у публічным Telegram-чаце рэпост публікацыі са зместам "пора выносить мусор". Паведамленне суправаджалася выявай Андрэя Зельцэра са стрэльбай у руках.