Віталь Віктаравіч Чопік — жыхар Брэста, які хадзіў на палітычна матываваныя суды. 

БелТА пісала, што мужчына "разам з саўдзельнікамі... сістэматычна наведваў суды па крымінальных справах экстрэмісцкай накіраванасці. Ён фіксаваў ход і вынікі пасяджэнняў, інфармацыю аб сведках і прадстаўніках праваахоўных органаў”. Яго здымалі на камеру пасля такіх судоў і спрабавалі задаваць пытанні. Закадравы голас паказвае ў кадры Чопіка і называе мужчыну “заўсёднікам” падобных судоў: маўляў, “рэгулярна наведвае судовыя працэсы, дзе абвінавачаныя — прыхільнікі апазіцыйных поглядаў”.

Паводле звестак, атрыманых у розны час ад крыніц “Брэсцкай вясны” вядома, што ў мужчыны праводзілі ператрус 1 снежня 2021 года. А ў верасні 2022 года Чопіка затрымалі спачатку па артыкуле 19.11 КаАП, але калі аказалася, што ў мужчыны проста няма тэлефона, дзе могуць быць нейкія “экстрэмісцкія матэрыялы”, то склалі пратакол ужо па арт.24.23 КаАП. Падставай для пратаколу стаў БЧБ-сцяг, прылеплены скотчам знутры да акна дома, хаця сам Чопік сцвярджаў, што сцяг з'явіўся ўжо пасля таго, як яго затрымалі і даставілі ў ІЧУ.

Напачатку сакавіка 2024 года берасцейца зноў затрымалі. Паводле звестак “Брэсцкай вясны”, пасля затрымання мужчыну дастаўлялі ў шпіталь на хуткай са слядамі моцнага збіцця, а колер твару Чопіка быў жоўтым (што можа казаць аб пашкоджанні печані праз збіццё).

12 сакавіка быў адміністрацыйны суд паводле арт. 24.3 КаАП за нібыта непадпарадкаванне патрабаванням міліцыі. Як вынікае з рашэння суда, Чопік казаў, што на працягу 1 хвіліны адчыніў дзверы ГУБАЗіК для ператрусу — але супрацоўнік ГУБАЗіК сцвярджаў, што гучна патрабаваў адкрыць дзверы цэлых 20 хвілін. Ператрус праводзіўся ў межах крымінальнай справы паводле ч. 1 арт. 361-1 КК (стварэнне, кіраўніцтва экстрэмісцкім фармаваннем). Яму прад'явілі абвінавачанне паводле арт. 361-4 Крымінальнага кодэкса.

А 28 сакавіка 2024 г. МУС абвясціла што змясціла берасцейца ў СІЗА. 

Напрыканцы красавіка 2024 г. стала вядома, што Віталю збіраюцца дадаць яшчэ адзін артыкул, пра гэта паведамілі праўладныя тэлеграм-каналы. Паводле іх, Віталь удзельнічаў у "масавых беспарадках у Брэсце ў 2020 годзе". Раней палітвязню быў інкрымінаваны толькі арт. 361-4 КК (садзейнічанне экстрэмісцкай дзейнасці).

У Брэсцкім абласным судзе 21 кастрычніка 2024 г. распачаўся суд над Віталём паводле ч. 1 і ч. 2 арт. 361-4 КК (садзейнічанне экстрэмісцкай дзейнасці) і арт. 342 КК (актыўны ўдзел у дзеяннях, што груба парушаюць грамадскі парадак). Справу прызначаны весці Яўген Брэган.  

22  і 23 кастрычніка і 13, 14 лістапада 2024 г. суд працягнуўся. А 15 лістапада агучылі прысуд Віталю: сем гадоў пазбаўлення волі, а таксама штраф памерам 1000 базавых велічыняў (40 000 рублёў).

За наведванне палітычных працэсаў у Брэсце Віталя Чопіка асудзілі да 7 гадоў калоніі

У Брэсцкім абласным судзе 15 лістапада агучылі прысуд 41-гадоваму Віталю Чопіку, якога затрымалі восем месяцаў таму за наведванне палітычна матываваных судоў. Суддзя Яўген Брэган прызначыў Віталю сем гадоў пазбаўлення волі, а таксама штраф памерам 1000 базавых велічыняў (40 000 рублёў), піша "Берасцейская Вясна". Мужчыну абвінавацілі паводле ч. 1 і ч. 2 арт. 361-4 КК (садзейнічанне экстрэмісцкай дзейнасці) і арт. 342 КК (актыўны ўдзел у дзеяннях, што груба парушаюць грамадскі парадак). Вядома, што пасля затрымання мужчыну дастаўлялі ў шпіталь са слядамі моцнага збіцця.

За наведванне палітычных працэсаў у Брэсце судзяць Віталя Чопіка

У Брэсцкім абласным судзе 21 кастрычніка распачынаецца суд над 41-гадовым Віталём Чопікам, якога затрымалі сем месяцаў таму за наведванне палітычна матываваных судоў. Пасля затрымання мужчыну дастаўлялі ў шпіталь са слядамі моцнага збіцця. Цяпер мужчыну абвінавачваюць паводле ч. 1 і ч. 2 арт. 361-4 КК (садзейнічанне экстрэмісцкай дзейнасці) і арт. 342 КК (актыўны ўдзел у дзеяннях, што груба парушаюць грамадскі парадак). Справу прызначаны весці Яўген Брэган.

Затрыманага ў Брэсце Віталя Чопіка вазілі ў шпіталь са слядамі моцнага збіцця

Нагадаем, 28 сакавіка 2024 года МУС паведаміла, што ў СІЗА змясцілі 40-гадовага жыхара Брэста, які хадзіў на суды.