Віктар Валер'евіч Шаура быў затрыманы ў Наваполацку ўвечары 10 жніўня 2020 года. 13 жніўня ягонай маці патэлефанаваў следчы з Віцебска і паведаміў, што яе сына падазраюць па ч. 2 арт. 293 Крымінальнага кодэкса — "удзел у масавых беспарадках".

У кватэры Віктара прайшоў ператрус.

Утрымліваўся ў СІЗА-1 г. Віцебска. Пасля яго адпусцілі пад падпіску.

21 студзеня 2021 года суддзя Віталь Лапко з суда горада Наваполацка асудзіў Віктара Шауру (разам з Віталём Шыцікавым) на два гады "хіміі" па арт. 342 Крымінальнага кодэкса (арганізацыя або актыўны удзел у групавых дзеяннях, якія груба парушаюць грамадскі парадак).

Паводле абвінавачвання, "Віктар Шаура разам з Віталём Шыцікавым і іншымі нявысветленымі асобамі ўвечары 10 жніўня прынялі актыўны ўдзел ў групавых дзеяннях, якія груба парушылі грамадскі парадак <...> разам з іншымі рухаліся па праезнай частцы вуліцы Маладзёжнай Наваполацка, ішлі наперадзе групы грамадзян, на забаронены сігнал светлафора, перакрывалі рух транспарту,  гучна крычалі “Жыве Беларусь!”, “Ганьба”, “Позор”, “Уходи!”, пляскалі ў далоні, нецэнзурна лаяліся ў бок прадстаўнікоў праваахоўных органаў".

На пачатку чэрвеня 2021 года Шауру і Шыцікава выпусцілі з "хіміі" пад падпіску аб нявыездзе да паўторнай апеляцыі. 22 чэрвеня 2021 г. ім замянілі пакаранне на два гады калоніі (Шауру) і два з паловай гады калоніі (Шыцікаву). У ліпені 2021 г. Віктар Шаура пачаў адбываць новае пакаранне.

Напрыканцы снежня 2022 г. суддзя Аляксандр Кірыловіч прыняў рашэнне перавесці Віктара на турэмны рэжым да канца тэрміну.

Палітвязня перавялі з ПК № 22 у магілёўскую Турму № 4.

Па падліках праваабаронцаў мусіў выйсці на волю 4 снежня 2023 г. 

Наваполацк: судзяць "арганізатараў" групавых дзеянняў, якія парушылі грамадскі парадак

У судзе горада Наваполацка 13 студзеня працягваецца разгляд крымінальнай справы Віктара Шаура і Віталя Шыцікава, якіх абвінавачваюць у арганізацыі або актыўным удзеле ў групавых дзеяннях, якія груба парушылі грамадскі парадак (арт. 342 Крымінальнага кодэкса).

У Наваполацку працягваецца суд над актыўнымі ўдзельнікамі жнівеньскіх падзей

Віктар Шаура быў затрыманы ў Наваполацку ўвечары 10 жніўня. 13 жніўня яго маці патэлефанаваў следчы з Віцебска і паведаміў, што яе сыну выставілі абвінавачванне па ч. 2 арт. 293 КК РБ, якое пазней было перакваліфікаванае на больш жорсткі артыкул. У кватэры Шауры прайшоў ператрус.

Па два гады "хіміі". У Наваполацку вынеслі прысуды за жнівеньскія пратэсты

Суд горада Наваполацка 21 студзеня вынес прысуд па крымінальнай справы супраць Віктара Шауры і Віталя Шыцікава па арт. 342 Крымінальнага кодэкса (арганізацыя або актыўны удзел у групавых дзеяннях, якія груба парушылі грамадскі парадак) за падзеі 10 жніўня ў Наваполацку. Суддзя Віталь Лапко асудзіў іх на два гады "хіміі" кожнага.