Сяргей Віктаравіч Наліўка — фігурант брэсцкай "справы карагодаў", распачатай пасля падзеяў 13 верасня 2020 года ў горадзе (калі пратэстоўцы выйшлі на праезную частку, а іх разагнаў вадамёт).

У судзе Маскоўскага раёна Брэста 7 траўня 2021 г. асудзілі яшчэ 14 фігурантаў па "справе карагодаў". Суддзя Іна Клышпач прызнала усіх вінаватымі. Сяргей Наліўка атрымаў два гады абмежавання волі з накіраваннем ва ўстанову адкрытага тыпу ("хімія").

З 26 ліпеня 2021 г. пачаў адбываць пакаранне ў ПУАТ № 9. Вядома, што з 18 красавіка па 18 траўня 2022 г. Сяргея змяшчалі ў ШІЗА.

21 ліпеня 2022 г. у судзе Чыгуначнага раёна Віцебска палітвязню змянілі рэжым утрымання. Сяргея Наліўку перавялі ў калонію на 6 месяцаў і 1 дзень да канца тэрміну.

Паводле інфармацыі праваабаронцаў, 14 кастрычніка 2022 г. суддзя Маскоўскага раёна Брэста Вольга Аліферук асудзіла палітзняволенага яшчэ раз — за абразу прадстаўніка ўлады (арт. 369 Крымінальнага кодэксу). Рашэнне ўдакладняецца.

Вядома, што напрыканцы кастрычніка 2022 г. Сяргей знаходзіўся ў івацэвіцкай ПК № 5.

Паводле інфармацыі праваабаронцаў, палітвязень цалкам адбыў тэрмін і ў студзені 2023 г. выйшаў на волю.

Да года калоніі. Па брэсцкай "справе карагодаў" пакаралі яшчэ 14 чалавек

У судзе Маскоўскага раёна Брэста 7 траўня асудзілі яшчэ 14 фігурантаў па "справе карагодаў" па ч. 1 арт. 342 Крымінальнага кодэкса за ўдзел 13 верасня ў карагодзе на скрыжаванні бульвара Касманаўтаў і праспекта Машэрава, калі пратэстоўцы былі разагнаныя вадамётам. Суддзя Іна Клышпач прызнала ўсіх вінаватымі і прызначыла пакаранне ад 1,5 года "хатняй хіміі" да 1 года калоніі.