Сяргей Анатольевіч Моніч — жыхар Заслаўля, мае двух непоўнагадовых дзяцей. Быў затрыманы 21 снежня 2020 года.

Другога красавіка 2021 года судом Мінскага раёна асуджаны за нанясенне надпісаў «АМАП – забойцы», «3%» па ч. 1 арт. 339 КК (Хуліганства) да 1 года пазбаўлення волі, за нанясенне надпісу «Кубракоў – фашыст» па арт. 369 КК (Абраза прадстаўніка ўлады) да 3 месяцаў арышту, а таксама за захоўванне і перавозку наркатычнага сродку – марыхуаны масай 0,1 г без мэты збыту па ч. 1 арт. 328 КК да 2 гадоў пазбаўлення волі. Шляхам частковага складання пакаранняў яму прызначана пакаранне ў выглядзе 3 гадоў пазбаўлення волі ў папраўчай калоніі ва ўмовах агульнага рэжыму.

Паводле інфармацыі праваабаронцаў, з 7 сакавіка да 7 чэрвеня 2022 года адміністрацыя магілёўскай калоніі № 15 бесперапынна ўтрымлівала Сяргея Моніча ў штрафным ізалятары, дзе вязні знаходзяцца без пасцельнай бялізны, штодзённага шпацыру, тэлефанаванняў, лістоў і магчымасці "атаваркі".

У верасні 2023 г. Сяргей выйшаў на волю. 

За тры гады – 150 сутак штрафнога ізалятара і ніводнага спаткання: гісторыя былога палітвязня з Заслаўя

Былы палітвязень з Заслаўя Сяргей Моніч “ад званка да званка” адбыў трохгадовае пакаранне ў Магілёўскай папраўчай калоніі №15 за нанясенне пратэсных надпісаў. У верасні мінулага года Моніч вызваліўся, агулам правёўшы ў штрафным ізалятары 150 сутак. Але праз 56 дзён на волі яго затрымалі зноў і асудзілі на 15 сутак. Сяргей распавядае “Вясне” пра свой цяжкі досвед і аб сваім рашэнні пакінуць Беларусь.

Заключэнне экспертаў і аналітыкаў ПЦ "Вясна" па крымінальнай справе па абвінавачванні Сяргея Моніча

У дачыненні да пераследу Сяргея Моніча па артыкулах 339 і 369 за нанясенне надпісаў пратэстнага характару мы, эксперты ПЦ «Вясна», у чарговы раз пацвярджаючы неаднаразова выказаныя праваабарончай супольнасцю патрабаванні па дэкрыміналізацыі дыфамацыі і недапушчальнасці пазбаўлення волі грамадзян за абразу службовых асоб, дзяржавы, дзяржаўных органаў і сімвалаў.