Павел Іванавіч Наздра — экалагічны актывіст з Мазыра, быў затрыманы ў межах крымінальнай справы па арт. 361-4 Крымінальнага кодэксу (Садзейнічанне экстрэмісцкаму фарміраванню). Яго абвінавацілі ў тым, што ён нібыта перадаў фота расійскай вайсковай тэхнікі Telegram-каналу "Беларускі Гаюн". Мужчыну ўзялі пад варту.

Павел Наздра вядомы тым, што з’яўляўся прадстаўніком у Мазыры ініцыятывы "Зялёны дазор". Ён арганізаваў у горадзе шэраг экалагічных акцыяў і ініцыятываў, у якіх удзельнічалі ў тым ліку і прадстаўнікі ўладных органаў. Таксама Павел Наздра з’яўляецца адным з сузаснавальнікаў партыі Беларуская Хрысціянская дэмакратыя. 

9 верасня 2022 г. у Гомельскім абласным судзе пачаўся разгляд справы мазырскага экаактывіста. 15 верасня суддзя Людміла Грынько прызначыла яму два гады калоніі ва ўмовах агульнага рэжыму.

Цяперашняе месцазнаходжанне ўдакладняецца.

"Быў рады, што расійскія войскі з'язджаюць": палітзняволенага Паўла Наздру асудзілі да двух гадоў калоніі за паведамленне "экстрэмісцкаму" тэлеграм-каналу пра перамяшчэнне расійскіх вайскоўцаў

Суду Наздра растлумачыў, што асуджае вайну ва Украіне і калі ўбачыў, што расійская вайсковая тэхніка з'яжджае з Мазыра, падумаў, што расійскія войскі "ўцякаюць", таму што церпяць паражэнне на тэрыторыі Украіны. З гэтай нагоды, кажа, ён і пакінуў паведамленне ў тэлеграм-канале, дзе распісаў, якая колькасць расійскай вайсковай тэхнікі і ў якім кірунку рухаецца. Да свайго паведамлення Павел далучыў здымкі вайсковай тэхнікі.