Наталля Анатольеўна Хершэ мае два грамадзянствы — Беларусі і Швейцарыі. Пастаянна пражывае ў Швейцарыі апошнія 12 гадоў разам з непаўналетняй дачкой. Бывае ў Беларусі раз у год.

Чарговым разам яна прыехала ў Мінск 11 верасня 2020 года і пасля сустрэчы з сяброўкай 19 верасня далучылася да "жаночага маршу" каля Камароўскага рынку. Гэта адзіны раз, калі Наталля паўдзельнічала ў маршы (на 21 верасня ў яе быў набыты зваротны квіток у Швейцарыю).

У той дзень яе затрымалі ў межах адміністрацыйнай справы па арт. 23.34 КаАП (удзел у несанкцыянаваным масавым мерапрыемстве). Пры затрыманні Наталля не падпарадкавалася патрабаванню супрацоўнікаў прайсці ў спецаўтатранспарт, спрабавала збегчы, а калі яе дзеянні былі спыненыя супрацоўнікам АМАП Сяргеем Кончыкам, яна аказала супраціў: вырывалася і ўпіралася, схапіла Кончыка за твар і падрапала, сцягнула балаклаву. Праз гэта на яе завялі крымінальную справу па арт. 363 КК РБ (Супраціў супрацоўніку міліцыі).

Да суда Наталля ўтрымлівалася ў СІЗА ў Жодзіна. 3 снежня пачаўся разгляд яе крымінальнай справы.

7 снежня 2020 суддзя Суда Савецкага раёна Мінска Сяргей Шаціла агучыў прысуд — 2 гады і 6 месяцаў папраўчай калоніі ва ўмовах агульнага рэжыму. Менавіта столькі прасіў раней дзяржабвінаваўца.

У верасні 2021 года гомельскі суд прыняў рашэнне замяніць Наталлі рэжым на турэмны, які яна адбывала ў Турме № 4. 

30 студзеня 2022 Наталля абвясціла галадоўку.

18 лютага 2022, пасля 17 месяцаў у зняволенні, Наталля Хершэ выйшла на волю. Пра гэта паведаміў у сваім Twitter прэзідэнт Швейцарскай Канфэдэрацыі Іньяцыо Касіс.

«Я рады, што дыпламатычныя намаганні Швейцарыі акупіліся. Мы з пасольствам Швейцарыі ў Беларусі працягваем заклікаць да вызвалення ўсіх арыштаваных за ажыццяўленне палітычных і грамадзянскіх правоў», — напісаў Касіс.

Наталля Хершэ павінна была выйсці на волю 27 студзеня 2023 году. Пра гэта яна пісала ў лісце сваёй дачцэ ў кастрычніку 2021 года.

Брат Наталлі Хершэ распавёў "Нашай Ніве" пра яе вызваленне:

«Мяне запрасілі ў амбасаду, сакратарка папрасіла ўзяць дакументы Наталлі, якія захоўваліся ў мяне, але я абсалютна нічога не ведаў. Проста думаў, што для чагосьці спатрэбіліся дакументы.

А мяне павіншавалі з вызваленнем Наталлі і сказалі, што праз 15 хвілін выязджаем на машыне ў аэрапорт у віп-залу. Туды прывезлі Наталлю ў бусіку ў турэмнай робе.

Мы каля 40 хвілін прасядзелі ў зале чакання, праўда, у прысутнасці службовых асобай. Нас пачаставалі кавай, гарбатай, цукеркамі.

Наталля вельмі худая, настолькі тонкая… Усе валасы сівыя, толькі кончыкі бялявыя засталіся. Казала, што траціна валасоў выпала. Але нават так яна выглядае добра. Настрой пазітыўны. Вытрымала».

«У Швейцарыі ў яе было цудоўнае жыццё, але яна лічыла, што цяпер мусіць быць на радзіме». Хто такая Наталля Хершэ, якую пасадзілі за сарваную балаклаву

Апошнія 12 год Наталля Хершэ жыла ў Швейцарыі. Там яна атрымала другое грамадзянства, там яе чакаюць дзеці і любімы мужчына. Невядома, калі яны змогуць убачыцца зноў.

Пачаўся суд над грамадзянкай Швейцарыі за падраную балаклаву

У судзе Савецкага раёна горада Мінска пачаўся працэс па крымінальнай справе ў дачыненні да Наталлі Хершэ па частцы 2 артыкула 363 (Супраціў супрацоўніку органаў унутраных спраў). 51-гадовую жанчыну абвінавачваюць у тым, што пры аказанні супраціву пры затрыманні на жаночым маршы 19 верасня яна сарвала маску амапаўцу і падрапала яго. Пацярпелы — 22-гадовы Сяргей Кончык, супрацоўнік АМАП ГУУС Мінгарвыканкама. Суддзя — Сяргей Шаціла.

За падраную балаклаву грамадзянка Швейцарыі атрымала 2 гады і 6 месяцаў калоніі

Суддзя Суда Савецкага раёна горада Мінска Сяргей Шаціла 7 снежня агучыў прысуд па крымінальнай справе грамадзянкі Швейцарыі Наталля Хершэ — 2 гады і 6 месяцаў папраўчай калоніі ва ўмовах агульнага рэжыму. Менавіта столькі запытваў раней дзяржабвінаваўца. Таксама спагнаць з Наталлі на карысць пацярпелага супрацоўніка АМАП Сяргея Кончыка матэрыяльную кампенсацыю маральнай шкоды ў памеры 1000 рублёў, дзяржаўную пошліну ў 81 рубель, працэсуальныя выдаткі ў 11 капеек. Рэчы Наталлі, канфіскаваныя пры затрыманні (мабільны тэлефон, гадзіннік Apple Watch) пакінуць пад арыштам, а яе бел-чырвона-белы сцяг знішчыць. Сапсаваную балаклаву (раней у судзе агучваўся яе кошт —1 рубель) — адрадзіць.