Ларыса Міхайлаўна Кузьменка - жыхарка Гомеля, былая супрацоўніца прадпрыемства "Гомельшпалеры". Яна была затрыманая ў жніўні 2021 года.

Ёй прад'явілі абвінавачванне за гвалт ці пагрозу гвалту супрацоўнікам АУС за нядзельны Марш 27 верасня мінулага года ў Гомелі, калі супраць пратэстоўцаў сілавікі выкарыстоўвалі слезацечны газ і светлашумавыя гранаты. Жанчыне выставілі абвінавачванні ў тым, што яна "грубай фізічнай сілай узяла сілавіка за руку, тым самым зрушыла яго з месца і не дазволіла яму працаваць". 

Жанчыну па артыкуле 364 Крымінальнага кодэксу асудзілі на два гады пазбаўлення волі ў калоніі агульнага рэжыму.

У Ларысы дыягнаставанае дэпрэсіўнае расстройства з сіндромам клаўстрафобіі.

У сярэдзіне лютага 2022 стала вядома, што Ларысу перавялі з СІЗА-3 у ПК № 4.

У пачатку траўня 2023 г. стала вядома, што Ларыса цалкам адбыла пакаранне і выйшла на волю з ПК № 4.

У СІЗА з сіндромам клаўстрафобіі: дачка гамяльчанкі распавяла гісторыю затрыманай за нядзельны Марш

У гомельскім следчым ізалятары амаль тры месяцы ўтрымліваецца 49-гадовая былая супрацоўніца прадпрыемства "Гомельшпалеры" Ларыса Кузьменка. Ёй прад'явілі абвінавачванне за гвалт ці пагрозу гвалту супрацоўнікам АУС за нядзельны Марш 27 верасня мінулага года ў Гомелі, калі супраць пратэстоўцаў сілавікі выкарыстоўвалі слезацечны газ і светлашумавыя гранаты.

Гамельчанку з сіндромам клаўстрафобіі суд адправіў у калонію на 2 гады

У судзе Цэнтральнага раёну Гомеля сёння абвешчаны прысуд па крымінальнай справе супраць 49-гадовай Ларысы Кузьменка, якую ўтрымліваюць з сіндромам клаўстрафобіі ў СІЗА амаль чатыры месяцы. Жанчыну абвінавацілі ў гвалце ў адносінах да супрацоўніка АМАПу (арт. 364 КК) на нядзельным Маршы 27 верасня мінулага года ў Гомелі, калі супраць пратэстоўцаў сілавікі выкарыстоўвалі слезацечны газ і светлашумавыя гранаты. Згодна версіі абвінавачвання, Кузьменка схапіла за руку амапаўца, чым перашкаджала яму працаваць. Жанчына віну не прызнае і адмовілася ад дачы паказанняў, як на судзе, так і падчас следства. Сёння пракурор Сідоранка запрасіў у суда пакаранне ў выглядзе пазбаўлення волі тэрмінам на два гады ва ўмовах агульнага рэжыму. Праз некалькі гадзінаў суддзя Сяргей Салоўскі прызначыў Ларысе Кузьменка менавіта такое пакаранне, якое прасіла дзяржабвінавачванне.