Юрый Ігаравіч Джэнжэра з Фаніпаля быў затрыманы ў жніўні 2022 года ў межах крымінальнай справы паводле артыкула 342 Крымінальнага кодэксу (Групавыя дзеянні, якія груба парушаюць грамадскі парадак). Яго абвінавачваюць у тым, што ў 2020 годзе перакрываў рух транспарту ў Фаніпалі — а менавіта ішоў па дарозе падчас акцыі пратэсту.

Юрый прафесійна займаецца міні-футболам, мае спартовы досвед больш за 20 гадоў. Раней граў за дзяржынскі клуб "Лівадыя", выступаў на абласных і рэспубліканскіх спаборніцтвах, восем гадоў быў капітанам футбольнай каманды. Таксама Юрый у Фаніпалі займаўся пасажырскімі перавозкамі. Мужчына мае дваіх дзяцей.

У судзе Дзяржынскага раёну 9 лютага 2023 г. Юрыя Джэнжэру прызналі вінаватым паводле ч. 1 арт. 342 КК. Суддзя Таццяна Фядчук прызначыла яму два з паловай гады абмежавання волі без накіравання ў папраўчую ўстанову адкрытага тыпу ("хатняй хіміі"). Мужчыну вызвалілі з-пад варты ў зале суда.

Спартоўца з Фаніпаля асудзілі на два з паловай гады "хатняй хіміі" за ўдзел у пратэстах у 2020 годзе

Мяркуючы па відэа, якое апублікавалі сілавікі, доказамі «блакіроўкі дарог» сталі «сторысы» аднаго з затрыманых у Instagram — на іх людзі ідуць па дарозе. Яны былі ў архіве профіля і знайшлі іх супрацоўнікі, хутчэй за ўсё, пасля «вывучэння» тэлефона мужчыны.

"Хапуны", прысуд у 2 гады калоніі, заклікі міліцыянтаў "здацца" ў мясцовым чаце: што вядома пра "фаніпальскую справу" за падзеі 2020 года

У жніўні 2022-га года сілавікі ўзбудзілі крымінальную справу паводле ч. 1 арт. 342 Крымінальнага кодэкса за ўдзел у акцыях пратэсту ў жніўні 2020-га года ў Фаніпалі. Лічба фігурантаў гэтай справы ідзе ўжо на дзясяткі. Першаму затрыманаму прызначылі два гады калоніі, яшчэ некалькі чалавек у Дзяржынску асудзілі да "хатняй хіміі". Перыядычна супрацоўнікі ГУБАЗіКа ладзяць у Фаніпалі "хапуны", апошні з іх адбыўся 24 студзеня, падчас якога было затрымана каля 20 чалавек. Мясцовыя жыхары распавялі "Вясне", што вядома пра "фаніпальскую справу" і пра храналогію пераследу ў гэтым гарадку.