26 траўня ў судзе Івацэвіцкага раёна разгледзелі справу ў дачыненні да рабочага мясцовага ААТ Юрыя Аркадзевіча Басалая. Яго абвінавацілі адразу паводле двух артыкулаў: «Абраза прадстаўніка ўлады» (арт. 369 КК) і «Незаконныя без мэты збыту выраб, перапрацоўка, набыццё, захоўванне, перавозка ці перасыланне наркатычных сродкаў» (ч. 1 арт. 328 КК).

Усё пачалося 9 лістапада 2020 года. У той дзень Басалай у адным з Telegram-чатаў пад пастом з фатаграфіяй супрацоўніка АМАП напісаў каментар са словам «тварь». Гэтым Басалай падтрымаў меркаванне большасці ўдзельнікаў чата, якія абмяркоўвалі амапаўца.

Праз год, у сярэдзіне лістапада 2021-га, Юрый Басалай вырашыў з'ездзіць на поле паблізу ад адной з вёсак Івацэвіцкага раёна, каб нарваць там лісце дзікарослых канопляў для асабістага ўжывання. Там ён убачыў невялікую палянку канопляў — сарваў некалькі кустоў і склаў іх у пакет. Туды і назад дабіраўся на спадарожных машынах. Затым у сваёй кватэры Юрый падзяліў сабраныя каноплі на дзве часткі — адну скурыў на працягу некалькіх месяцаў, а другую захоўваў у слоіку на сваёй кухні, у маразільнай камеры лядоўні.

1 сакавіка 2022 года ў кватэру да Юрыя наведаліся супрацоўнікі міліцыі ў межах крымінальнай справы, распачатай за абразу амапаўца. Яны і знайшлі ў халадзільніку слоік «з нейкім сыпкім рэчывам». Калі адзін з міліцыянтаў паставіў ёмістасць на стол, то Басалай схапіў яе і паспрабаваў выкінуць праз акно — аднак супрацоўнікі міліцыі паспелі яму перашкодзіць. Тады Юрый прызнаўся, што ў слоіку знаходзіцца марыхуана.

Акрамя таго, падчас агляду кватэры былі забраныя мабільны тэлефон, два ноўтбукі, а таксама пратэсныя стыкеры і бел-чырвона-белы сцяг. А самога Юрыя Басалая адправілі пад варту.

Юрыя Басалая асудзілі да зняволення тэрмінам на два гады і шэсць месяцаў з адбываннем пакарання ў папраўчай калоніі ва ўмовах агульнага рэжыму.

Вядома, што Юрыя паўторна абвінавацілі ў здзяйсненні злачынства паводле арт. 369 КК "Абраза прадстаўніка ўлады". 22 жніўня 2022 г. суддзя Ленінскага раёна Мінска Таццяна Шоцік прызнала палітвязня вінаватым і на падставе ч. 5 арт. 72 КК прызначыла яму канчатковае пакаранне ў выглядзе пазбаўлення волі на тэрмін 2 гады 6 месяцаў з адбываннем пакарання ў папраўчай калоніі ва ўмовах агульнага рэжыму.

Утрымліваўся ў СІЗА-7. Актуальнае месцазнаходжанне высвятляецца.

Палітзняволенага Юрыя Басалая, які ўжо некалькі месяцаў адбывае тэрмін па папярэдняй справе, ізноў асудзілі за каментар

Справу разглядала суддзя Таццяна Шоцік, якая неаднаразова выносіла палітычна матываваныя рашэнні.