Іван Барысавіч Мураўёў — журналіст, аператар і фатограф, уласнік "Кальяннай № 1" у Мінску. Раней яго затрымлівалі 11 жніўня 2020 года: мужчыну выцягнулі з машыны, калі ён разам з сябрам ехаў здымаць матэрыялы для тэлеканала "Звезда".

29 жніўня 2022 года супрацоўнікі Следчага камітэта затрымалі мужчыну наўпрост у "Кальяннай № 1". Мураўёву выставілі абвінавачанне паводле ч. 3 арт. 361-1 Крымінальнага кодэкса Рэспублікі Беларусь (удзел у экстрэмісцкім фармаванні). Яго змясцілі ў СІЗА-1.

У Мінскім гарадскім судзе 26 снежня 2022 г. палітзняволенага асудзілі да двух з паловай гадоў калоніі ва ўмовах агульнага рэжыму. Працэс праходзіў у закрытым рэжыме, таму падрабязнасці справы невядомыя. Прысуд вынесла Алена Шылько.

"Беларуская асацыяцыя журналістаў" пазней даведалася, што Мураўёва асудзілі за відэаздымкі для расследавання журналіста Станіслава Івашкевіча, якое выйшла на тэлеканале "Белсат". Сюжэт пад назвай "Сяброўка Ліліі Лукашэнка і алігархі сталі бенефіцыярамі справы артапедаў" з’явілася ў ліпені 2022-га. 

Разгляд апеляцыйнай скаргі адбыўся 10 сакавіка 2023 г. у Вярхоўным судзе.

У канцы сакавіка 2023 г. Івана этапавалі ў бабруйскую ПК № 2.

МУС дадаў палітзняволенага ў "спіс экстрэмістаў" 7 красавіка 2023 г.

Уласніка "Кальяннай № 1" у Мінску і журналіста Івана Мураўёва асудзілі да двух з паловай гадоў калоніі

Цікава, што суд пастанавіў вярнуць пасведчанне Івана Мураўёва аб сяброўстве ў БАЖ у арганізацыю "Беларуская асацыяцыя журналістаў" (тэхнічны механізм "вяртання" пры гэтым застаўся адкрытым). Наогул не выключана, што БАЖ проста пераблыталі з праўладным Беларускім саюзам журналістаў.