Ігар Віктаравіч Букас — жыхар Бабруйска, былы капітан міліцыі, разам з сынам Алегам абвінавачаны і асуджаны па артыкуле 364 Крымінальнага кодэкса (гвалт у дачыненні да супрацоўнікаў міліцыі). Згодна з указам А. Лукашэнкі ад 19 верасня 2022 г. быў пазбаўлены звання.

Ігар і Алег Букасы былі затрыманыя 10 жніўня 2020 г. У той дзень сям'я накіроўвалася ў краму, але не даехала да яе каля ста метраў, бо дарога была ачэпленая з-за акцыі пратэсту. Непадалёк ад месца, дзе Букасы прыпаркавалі машыну, яны заўважылі іншае аўто і аўто ДАІ. Каля гэтых машын нейкая жанчына прасіла адпусціць кіроўцу. Старэйшы Букас вырашыў пацікавіцца, што адбываецца, і падыйшоў да супрацоўніка ДАІ. У выніку ён і яго сын былі гвалтоўна затрыманы.

27 лістапада 2020 г. бацьку і сыну вынесеныя прысуды. Ігар Букас прысуджаны да чатырох гадоў пазбаўлення волі ў калоніі строгага рэжыму. Алег Букас пакараны двума гадамі пазбаўлення волі ў калоніі агульнага рэжыму.

У траўні 2022 г. стала вядома, што Ігару змянілі рэжым на турэмны і перавялі з ПК № 11 у Турму № 1.

9 жніўня 2024 г. Ігар выйшаў на волю.

Храналогія судовых пасяджэнняў:

Першае пасяджэнне па справе Ігара і Алега Букасаў

У першы судовы дзень заслухалі абвінавачаных, пацярпелага, трох сведак з ДАІ, жонку і маці Алену Букас.

Другое пасяджэнне 

На пасяджэнні заслухалі трох сведак: супрацоўніка дэпартаменту аховы Дзяніса Балыку, мужа і жонку Юлію і Дзмітрыя Осіпавых.

Трэцяе пасяджэнне

13 лістапада 2020 года ў судзе быў заслуханы пацярпелы Леанід Далганаў, намеснік камандзіра батальёна па тэхнічнай часткі і тылавому забеспячэнню аддзела Дэпартамента аховы, а таксама былі прагледжаныя відэа, на якіх зафіксавана, што адбывалася 10 жніўня і заслуханы матэрыялы справы.

Бабруйск: Ігара і Алега Букасаў асудзілі на чатыры і два гады калоніі адпаведна

27 лістапада 2020 года ў судзе Бабруйскага раёна і горада Бабруйска вынесены прысуд па справе Ігара і Алега Букасаў, якіх судзілі па артыкуле 364 Крымінальнага кодэкса. Ігар Букас асуджаны да чатырох гадоў пазбаўлення волі ў калоніі строгага рэжыму. Алег Букас пакараны двума гадамі пазбаўлення волі ў калоніі агульнага рэжыму.