Ганна Канстанцінаўна Крук — мастачка. Яе затрымалі ўвечары 29 лістапада 2023 года ў кавярні "Маркс" у Мінску. Праз два дні над жанчынай адбыўся суд паводле арт. 24.23 КаАП (несанкцыянаванае пікетаванне). Згодна з пратаколам, Ганна "дэманстравала карціну з БЧБ-сцягам, што стала даступна неабмежаванаму колу асоб".

Сваю віну Крук не прызнала і патлумачыла суду, што сапраўды размясціла ў кавярні сваю карціну, але на ёй няма выявы бел-чырвона-белага сцяга. У выніку суд пастанавіў арыштаваць дзяўчыну на 13 сутак.

Пасля "сутак" яна не выйшла на волю. Ганна ўтрымлівалася пад вартай у рамках крымінальнай справы паводле арт. 342 Крымінальнага кодэксу (Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх). 

Ганна ўтрымлівалася ў следчай турме № 8.

У судзе Кастрычніцкага раёна Мінска 8 лютага 2024 г. вынесены прысуд суддзёй Інай Сівец — 3 гады "хатняй хіміі". 

1 сакавіка 2024 унесена МУС у "спіс экстрэмістаў".

У Мінску за ўдзел у акцыі пратэсту да трох гадоў "хатняй хіміі" асудзілі мастачку

У судзе Кастрычніцкага раёна Мінска 8 лютага вынесены прысуд 32-гадовай мастачцы Ганне Крук. Жанчыну абвінавацілі ў арганізацыі і падрыхтоўцы дзеянняў, якія парушылі грамадскі парадак, альбо ўдзеле ў іх паводле ч. 1 арт. 342 Крымінальнага кодэкса. Справу разглядала суддзя Іна Сівец.