Дмітрыйс Міхайлаўс — грамадзянін Латвіі, якога абвінавацілі ў закліках у сацыяльных сетках да мераў абмежавальнага характару, скіраваных на прычыненне шкоды нацыянальнай бяспецы Беларусі (ч. 3 арт. 361), распальванні іншай сацыяльнай варожасці (ч.2 арт. 130), абразе прадстаўніка ўлады (арт. 369) і абразе Лукашэнкі (ч. 1 і ч.2 арт. 368). Міхайлаўс быў часова зарэгістраваны ў Мінскай вобласці.

Дмітрыйса Міхайлаўса затрымалі 1 сакавіка 2022 года і да суда змясцілі ў мінскі СІЗА. МЗС Латвіі раней паведамляў, што ў Міхайлаўса праверылі тэлефон і ўладам не спадабаліся паведамленні, якія асуджаюць рэжым Лукашэнкі.

У кастрычніку 2022 года Дзмітрый Міхайлаўс быў уключаны ў “Спіс асоб, датычных да тэрарыстычнай дзейнасці”.

Суд пачаўся 14 снежня 2022 г., але на працэс нікога не пусцілі, нават латвійскага консула. 21 снежня прадстаўнікі консульства на пасяджэнне трапілі, аднак асабліва ні на што паўплываць не змаглі. Згодна з Венскай канвенцыяй, яны маюць права звязвацца з грамадзянамі сваёй краіны і атрымліваць да іх доступ, але не маюць права ўмешвацца ва ўнутраныя справы іншай краіны.

Вядома таксама, што Дмітрыйса Міхайлаўса на месяц змяшчалі ў закрытую псіхіятрычную клініку дзеля правядзення экспертызы.

У Мінскім гарадскім судзе 30 снежня 2022 года вынесены прысуд: пазбаўленне волі тэрмінам на чатыры гады ў калоніі ва ўмовах агульнага рэжыму. Судовы працэс вяла суддзя Святлана Чарапанава.

У сакавіку 2023 г. стала вядома, што палітвязня этапавалі з СІЗА-1 у ПК № 3 у Віцьбе.

Грамадзяніна Латвіі асудзілі за каментары з асуджэннем рэжыму Лукашэнкі

У Мінскім гарадскім судзе 30 снежня вынесены прысуд па крымінальнай справе грамадзяніна Латвіі Дмітрыйса Міхайлаўса, абвінавачанага па шэрагу пратэсных артыкулаў.