Арцём Уладзіміравіч Такарчук – 34-гадовы архітэктар з Мінску.

Суд Цэнтральнага раёна Мінска 20 лістапада асудзіў яго па ч.2 арт. 363 Крымінальнага кодэкса на 3,5 гады калоніі за супраціў 13 верасня на "Марш герояў" салдату тэрміновай службы.

Арцёма затрымлівалі два разы, пасля якіх жорстка збівалі. Першы раз яму накладвалі швы на галаву, другі раз – у бальніцы дыягнаставалі страсенне мозгу, закрытую чэрапна-мазгавую траўму, шматлікія ўдары і гематомы па ўсім целе. Пацярпелы салдат у медцстанову не звяртаўся, пашкоджанняў не меў.

У апошнім слове Арцём прасіў не пазбаўляць яго волі, а даць займацца любімай справай – архітэктурай. Ён удзельнічаў у міжнародных конкурсах, мае грамату міністра інфармацыі за праект будынка Белтэлерадыёкампаніі. Прасіў суд не адпраўляць архітэктара ў калонію і пацярпелы салдат з в/ч 3214 Максім Чарнякоў.

Мінскага архітэктара пакаралі 3,5 гадамі калоніі за супраціў салдату на "Маршы герояў"

Суд Цэнтральнага раёна Мінска разглядае крымінальную справу ў дачыненні да 34-гадовага архітэктара Арцёма Такарчука. Хлопца абвінавачваюць у супраціве 13 верасня салдату тэрміновай службы па частцы 2 артыкула 363 Крымінальнага кодэкса. У той дзень у Менску праходзіў "Марш герояў". Калі салдаты пачалі атачаць пратэстоўцаў на вуліцы Мельнікайтэ і затрымліваць іх, у натоўпе пачалася паніка, некаторыя пачалі разбягацца і падаць. Па словах Арцёма Такарчука, ён хацеў дапамагчы і разняць упалых людзей. Але яго жорстка затрымалі, пасля чаго ў бальніцы яму наклалі швы на галаву. Праз два дні яго зноў затрымалі – ужо ў межах крымінальнай справы. І пасля гэтага затрымання яго дастаўлялі са Следчага камітэта ў бальніцу, дзе дыягнаставалі страсенне мозгу, закрытую чэрапна-мазгавую траўму, шматлікія ўдары і гематомы па ўсім целе. Суддзя Юлія Густыр пакарала Арцёма Такарчука 20 лістапада 3 гадамі і 6 месяцамі пазбаўлення волі ў калоніі агульнага рэжыму. Менавіта такое пакаранне і запрасіў пракурор Цвяткоў у суда для хлопца. «Вясна» распавядае падрабязнасці і акалічнасці гэтай справы.