Анжаліка Чэславаўна Борыс — старшыня "Саюза палякаў Беларусі". Яе затрымалі ў Гродне 23 сакавіка 2021 г. і склалі на яе пратакол за арганізацыю несанкцыянаванага масавага мерапрыемства — неафіцыйнага свята "Казюкі", а затым арыштавалі на 15 сутак.

Пазней стала вядома, што яна стала фігуранткай справы па ч. 3 арт. 130 Крымінальнага кодэксу аб дзеяннях, накіраваных на распальванне варожасці, рэабілітацыю нацызму. 

У канцы лістапада стала вядома, што Анжаліцы працягнулі тэрмін утрымання пад вартай да 25 студзеня 2022. Таксама з'явілася інфармацыя аб значным пагаршэнні ейнага здароўя.

25 сакавіка 2022 года стала вядома, што Борыс змянілі меру стрымання і перавялі яе з СІЗА ў следчай турме № 8 пад хатні арышт. Вядома, што яна не пісала прашэння аб памілаванні.

У пачатку красавіка 2023 года з'явілася інфармацыя, што Анжаліка Борыс, імаверна, вызваленая з-пад хатняга арышту: ёй уручылі дакумент аб спыненні справы "ў сувязі з адсутнасцю складу злачынства". Таксама ёй паабяцалі вярнуць усе рэчы, вынятыя падчас следства.

"Вельмі небяспечная тэндэнцыя". Ціск на польскую меншасць у Беларусі працягваецца

Ціск на польскую меншасць у Беларусі працягваецца. Следам за ператрусамі і затрыманнямі прадстаўнікоў Саюза палякаў у Брэсцкай і Гарадзенскай абласцях у межах крымінальнай справы за рэабілітацыю нацызма (ч. 3 арт. 130 Крымінальнага кодэкса) ўлады пачалі праверку ўстаноў, дзе вывучаецца польская мова і культура. Так, 29 сакавіка ў Смаргоні дырэктарцы школы вывучэння польскай мовы Вользе Будай раённая пракуратура даслала ліст, у якім просіць прадставіць звесткі аб тых, хто навучаўся ці навучаецца ў дадзены момант у школе (спісы асобаў, анкетныя дадзеныя, копіі плацёжных дакументаў).