Анастасія Сяргееўна Малашук — керамістка, была затрымана напрыканцы лютага 2022 года ў межах крымінальнай справы аб групавых дзеяннях, якія груба парушаюць грамадскі парадак (арт. 342 Крымінальнага кодэксу). Разам з ёй таксама быў затрыманы яе муж, Аляксей Кедыш.

Анастасію да суду змясцілі ў СІЗА-1.

15 ліпеня 2022 г. у Ленінскім судзе Мінска адбыўся судовы разгляд. Анастасію і ейнага мужа прызналі вінаватымі і асудзілі да трох гадоў абмежавання волі без накіравання ў ПУАТ кожнага.

5 снежня 2023 г. стала вядома, што Анастасію і Аляксея арыштавалі на 5 сутак. Інфармацыя пра гэта з'явілася на Instagram-старонцы іх брэнда piuceramics: "Мы з мужам зараз з'яжджаем на 5 сутак арышту ў Акрэсціна (такое рашэнне інспекцыі). У сувязі з гэтым вымушаная адмена заняткаў і наведванняў майстэрні. Вернемся да працы ў панядзелак 11 снежня".