Аляксандр Іосіфавіч Плескацэвіч з Ляхавіцкага раёна быў асуджаны да 2 гадоў абмежавання волі з накіраваннем у папраўчую ўстанову адкрытага тыпу ("хімія") паводле ч. 1 і ч. 2 арт. 339 Крымінальнага кодэкса ("Хуліганства") за чырвона-белыя надпісы і прызнанне ў каханні Святлане Ціханоўскай.

З сакавіка 2022 года пачаў адбываць пакаранне.

Вядома, што адміністрацыя папраўчай установы адкрытага тыпу № 43 у канцы траўня 2022 г. накіравала Аляксандра ў ШІЗА за парушэнне правіл распарадку. На яго наклалі дысцыплінарныя спагнанні спачатку за "неахайны вонкавы выгляд", а затым за "адмову ад уборкі месцаў агульнага карыстання". Таму мужчыну прызначылі 10 сутак у штрафным ізалятары, потым, пакуль ён знаходзіўся там, дадалі яшчэ 10 сутак.

У сярэдзіне чэрвеня 2022 г. Аляксандра змяшчалі ў магілёўскую турму № 4. Паведамлялася, што ва ўстанову яго прывезлі са шматлікімі слядамі збіцця. 

16 чэрвеня 2022 г. магілёўскі суд Ленінскага раёна пастанавіў узмацніць пакаранне і замяніць яго на калонію агульнага рэжыму. Аляксандра накіравалі ў ПК № 2, дзе ён і адбываў тэрмін да канца.

16 лютага 2023 г. выйшаў на волю. 

1 сакавіка 2023 г. над ім адбыўся суд паводле арт. 24.23 КаАП. Мужчыну абвінавацілі ў тым, што ён "у нявызначаны час з 16 па 27 лютага нанёс на 7 вокнаў і вугал фасада дома бел-чырвона-белую сімволіку". Віну Аляксандр не прызнаў і сказаў, што не рабіў гэтага і зафарбоўваць гэта не мае намеру. Вядома, што сімволіка на доме была яшчэ да затрымання палітвязня ў 2021 годзе. Паводле рапарта сведкі-міліцыянта, яшчэ на "хіміі" яму сказалі зафарбаваць сімволіку, але 27 лютага, калі мужчыну затрымлівалі, яна яшчэ была. Аднак суд у Ляхавічах прызнаў Плескацэвіча вінаватым і арыштаваў яго на 10 сутак.

28 лістапада 2023 г. у Аляксандра будзе яшчэ адзін суд, у Брэсцкім абласным судзе. Мужчыну інкрымінуюць два артыкулы: 130 прым. 1 ч. 1 (рэабілітацыя нацызму), 339 ч. 2 (хуліганства).

Таксама вядома, што 24 лістапада 2023 г. у Вярхоўным судзе будзе разглядацца скарга Аляксандра на затрыманне. Ён знаходзіцца пад вартай у СІЗА-7.

У Брэсцкім абласным судзе 11 снежня 2023 г. Аляксандра асудзілі па ч. 1 арт. 130-1 (рэабілітацыя нацызму), ч. 2 арт. 339 (хуліганства) Крымінальнага кодэкса. Суддзя Андрэй Сіз прызначыў Аляксандру тры гады калоніі ва ўмовах агульнага рэжыму.

На 30 студзеня 2024 г. прызначаны разгляд апеляцыйнай скаргі Аляксандра ў вярхоўным судзе. Старшыня судовай калегіі Аляксей Цяцюхін. 

Былога палітвязня асудзілі на 3 гады калоніі за "рэабілітацыю нацызма і хуліганства"

У Брэсцкім абласным судзе 11 снежня асудзілі былога палітвязня Аляксандра Плескацэвіча паводле ч. 1 арт. 130-1 (рэабілітацыя нацызму), ч. 2 арт. 339 (хуліганства) Крымінальнага кодэкса. Суддзя Андрэй Сіз прызначыў Аляксандру адзін год і шэсць месяцаў калоніі ва ўмовах агульнага рэжыму.

"Света, я вас кахаю". Жыхара вёскі Куршыновічы асудзілі за чырвона-белыя надпісы і прызнанне ў каханні Святлане Ціханоўскай

6 снежня ў судзе Ляхавічаў вінаватым у здзяйсненні злачынстваў паводле ч.1 і ч.2 арт. 339 КК РБ ("Хуліганства") прызналі 47-гадовага жыхара Ляхавіцкага раёна Аляксандра Плескацэвіча. У СІЗА мужчына знаходзіўся з 18 верасня.