Аляксей Юлдашавіч Раманаў — гомельскі актывіст, мае інваліднасць 2-й групы з прычыны анкалагічнага захворвання. Яго неаднаразова затрымлівалі падчас выбарчай кампаніі. Пасля вызвалення з калоніі ўлады анулявалі ягоную інваліднасць.

Ён актыўна ўдзельнічаў у агітацыйных пікетах штабу Святланы Ціханоўскай як валанцёр. На пікеце ў Хойніках 28 ліпеня 2020 года мужчына негатыўна выказаўся пра Аляксандра Лукашэнку. Супраць Раманава распачалі крымінальную справу.

16 снежня 2020 года суд Хойніцкага раёну прысудзіў адзін год у калоніі агульнага рэжыму за «абразу Лукашэнкі» (артыкул 368 Крымінальнага кодэкса). 

Аляксей Раманаў цалкам адбыў пакаранне і 23 лістапада 2021 года выйшаў на волю з ПК № 13.

Пасля вызвалення Аляксей не мог афіцыйна ўладкавацца на працу, яму ўсюды адмаўлялі. Ён падпрацоўваў на будоўлі і рамонтах.

Вядома, што ў студзені 2023 г. у былога палітзняволенага адбыўся ператрус.

Мужчыну затрымалі 16 сакавіка 2023 г. у Калінкавіцкім раёне. Як стала вядома, прычынай затрымання былі падпіскі на "экстрэмісцкія" паблікі, якія ён, хутчэй за ўсё, не выдаліў пасля 2020 года. Пасля затрымання Аляксея адвезлі ў лякарню на медкамісію, якая прызнала, што мужчына можа адбываць адміністрацыйны арышт. Да суду Аляксей Раманаў знаходзіўся ў калінкавіцкім ІЧУ, а суд пакараў Аляксея 2 суткамі арышту. Таксама суд пастанавіў канфіскаваць мабільны тэлефон у даход дзяржавы.

Аляксея Раманава 4 красавіка 2023 г. выклікалі на допыт у якасці сведкі ва Упраўленне Следчага камітэта па Гомельскай вобласці. Па якой справе Аляксей з'яўляецца сведкам, невядома, бо ён знаходзіцца пад падпіскай аб неразгалошванні.

23 студзеня 2024 г. Аляксея затрымалі ў Гомлі. Каля 6-7 раніцы да яго прыйшлі супрацоўнікі сілавых структураў і правялі ператрус. Затым Аляксея забралі на допыт у КДБ. Вядома, што гаворка ішла пра ўдзел былога палітвязня ў "экстрэмісцкім фармаванні". Суд прызначыў яму 15 сутак арышту.

Па інфармацыі "Свабоды", 8 студзеня 2024 г. Аляксея зноў асудзілі да 15 сутак арышту. Ён мае інваліднасць праз анкалагічную хваробу, шэраг цяжкіх хранічных захворванняў, ён прымае шмат лекаў і мусіць прытрымлівацца адмысловай дыеты. За першыя 15 дзён Аляксей тройчы трапляў у шпіталь, у яго былі моцныя прыступы. Але пасля шпіталю яго вярталі назад у ізалятар.

13 лютага 2024 г. Аляксея асудзілі па арт. 24.15 КаАП (парушэнне заканадаўства аб замежнай бязвыплатнай дапамозе), але вынік суда  пакуль невядомы. Пасля 30 сутак арышту ён выйшаў на волю. Аляксей мае інваліднасць, анкалагічнае захворванне і панкрэатыт. У ізалятары яму некалькі разоў рабілася блага. Яго адвозілі ў шпіталь і вярталі назад. Лекары сказалі, што ён патрабуе шпіталізацыі, яго пакладуць на лячэнне, калі адбудзе адміністрацыйны арышт. 

У вымушанай эміграцыі. 

"Пачалі пагражаць новай крыміналкай": Аляксей Раманаў пра пераслед пасля калоніі і рашэнне з'ехаць

Выбарчая кампанія 2020 года шмат што змяніла ў жыцці актывіста з Гомельшчыны Аляксея Раманава: на адным з агітацыйных пікетаў Святланы Ціханоўскай у Хойніках ён негатыўна выказаўся пра Аляксандра Лукашэнку. І гэта скончылася крымінальным пераследам. 16 снежня 2020 года суд Хойніцкага раёну прысудзіў Аляксею адзін год у калоніі агульнага рэжыму паводле арт. 368 Крымінальнага кодэкса (абраза Лукашэнкі). Але і пасля адбыцця пакарання ўлады не спынілі пераслед у дачыненні да хворага актывіста.

"У мяне рак і панкрэатыт, яны што — зусім ужо?" Былога палітвязня міліцыя абавязала палячыцца ад алкагалізму

Жыхар Гомеля Аляксей Раманаў трэці год змагаецца з ракам. Год ён правёў у турме за "абразу Лукашэнкі". "На волі мне няма спакою ад міліцыі і ўладаў. Забралі групу інваліднасці! Цяпер з нейкага перапуду абавязалі лячыцца ад алкагалізму!" — кажа былы палітвязень.

"Табе тут паміраць? Дай інтэрв'ю — і пойдзеш дадому". Вялікая размова з ракавым хворым, якія адседзеў год за абразу Лукашэнкі

Аляксею Раманаву 51, нядаўна ён выйшаў з глыбоцкай калоніі — там ён правёў год нібы за абразу Лукашэнкі. А яшчэ мужчына мае анкалагічнае захворванне. Пакуль ішоў тэрмін, у нашага суразмоўцы знайшлі новую пухліну, а доктар у лякарні для асуджаных прадказваў хуткую смерць — мужчына рыхтаваўся да яе, а не да вызвалення. Але 23 лістапада ён выйшаў на волю, на наступны дзень вярнуўся дадому і зараз вяртаецца да ранейшага жыцця.

Жыхара Гомеля з анкалогіяй пакаралі годам турмы за абразу Лукашэнкі

У крымінальнай справе зазначана, што Аляксей Раманаў, «маючы намер публічна абразіць прэзыдэнта, наўмысна прамовіў словы і фразы ў непрыстойнай форме, якія, згодна з экспертызай, змяшчаюць негатыўную ацэнку прэзідэнта Аляксандра Лукашэнкі».

Хойнікі: суд за абразу прэзідэнта зрабілі закрытым

Справу разглядае раённы суддзя Андрэй Кардаш. Інтарэсы Раманава прадстаўляе адвакатка Рагнэда Тагай.