Аксана Васільеўна Аляксеева — старшыня Мінскай гарадской арганізацыі АГП, была затрыманая разам з іншымі лідарамі партыі 27 ліпеня 2022 года. Вядома, што падчас ператрусу сілавікі выбілі дзверы ў ейную кватэру. Ёсць інфармацыя, што Аксана — "сардэчніца" і ёй увесь час трэба прымаць лекі.

Жанчыне выставілі абвінавачванне паводле ч. 1 арт. 342 КК (Удзел у дзеяннях, якія груба парушаюць грамадскі парадак).

Вядома, што на Акрэсціна Аксана захварэла на каранавірус, пасля чаго яе ўтрымлівалі ў "кавідным" аддзяленні ІЧУ. Праз гэтага палітзняволеную не пераводзілі на "Валадарку", а перадачы для яе не прымалі.

15 жніўня 2022 г. стала вядома, што Аксану перавялі з ІЧУ ў СІЗА-1.

Працэс над сябрамі АГП пачаўся 1 лістапада 2022 г. у судзе Першамайскага раёна Мінска. Трэцяга лістапада суддзя Анастасія Кулік прысудзіла палітзняволенай паўтара года пазбаўлення волі ў калоніі ва ўмовах агульнага рэжыму. Неўзабаве Аксану перавялі ў гомельскі СІЗА-3.

31 студзеня 2023 г. у Мінгарсудзе разглядзелі апеляцыйную скаргу лідараў АГП. Суддзя Жанна Брысіна пакінула прысуд без зменаў, а скаргу без задавальнення.

Аксану этапавалі з СІЗА-3 у гомельскую калонію № 4 у сярэдзіне лютага 2023 г.

21 кастрычніка 2023 г. Аксана выйшла на волю з гомельскай калоніі, цалкам адбыўшы тэрмін.

Да 2,5 гадоў калоніі: вынесены прысуды палітзняволеным лідарам АГП

2 лістапада палітзняволеныя, у тым ліку Аксана Аляксеева, выступілі з апошнім словам: "Мне шкада, што так адбылося, мне шкада, што я прыняла ў гэтым удзел. Я прызнаю сваю віну цалкам. Я раскайваюся. Калі я камусці даставіла нязручнасць, мне вельмі шкада, я гатовая папрасіць прабачэнне ў іх, у "Мінсктранса". Нельга было гэтага дапускаць. Я лічу сябе законапаслухмяным грамадзянінам і я за тое, каб выконваць Закон і не парушаць. У будучыні я магу паабяцаць, нават гарантаваць, што я не прыму ўдзел у якіх-небудзь акцыях, мерапрыемствах, і наогул не зраблю нічога такога, што парушала б Крымінальны ці Адміністрацыйны кодэксы".

"Я прызнаю сябе больш пацярпелым, чым вінаватым". У Мінску судзяць лідараў Аб’яднанай грамадзянскай партыі

Ніхто з міліцыянтаў не казаў пратэстоўцам, што ўдзел у "масавых несанкцыянаваных мерапрыемствах" — незаконны. І пра тое, што гэта прадугледжвае крымінальную адказнасць, а не адміністрацыйную, Аляксеева даведалася толькі ў 2022 годзе. Потым пракурорка зноў пачала цікавіцца, якую ролю выконвае Аляксеева ў арганізацыі. Але Аксана палічыла пытанне дзіўным і адмовілася ад адказу.