Вольга Віктараўна Залатар — актывістка і валанцёрка са Ждановіч. Была назіральніцай на выбарах у 2020 годзе. Скончыла Ліцэй БДУ і Факультэт філасофіі і сацыяльных навук БДУ. Мае пяцярых непоўнагадовых дзяцей.

Вольгу затрымалі 18 сакавіка, калі яна везла 10-гадовую дачку ў музычную школу. Супрацоўнікі ГУБАЗіКа развярнулі яе машыну і суправадзілі да дому. Там прайшоў ператрус, пасля якога Вольгу забралі ў ізалятар, а пазней перавялі ў СІЗА-1 на Валадарскага.

Прэс-служба УУС Мінаблвыканкама паведаміла, што жанчыну затрымалі «за актыўную пратэстную дзейнасць», яна была адміністратаркай мясцовага дваровага чата і арганізоўвала несанкцыянаваныя масавыя мерапрыемствы: чаяванні, прагулкі, канцэрты.

29 сакавіка Вользе прад'явілі абвінавачванне — "стварэнне экстрэмісцкага фарміравання альбо кіраўніцтва такім фарміраваннем або ўваходзячым у яго структурным падраздзяленнем" (артыкул 361-1 КК).  

31 сакавіка суд Партызанскага раёна адхіліў скаргу адваката Вольгі на пастанову аб ужыванні меры стрымання ў выглядзе заключэння пад варту. 

7 ліпеня — у дзень народзінаў — Вольгу Залатар перавялі на два тыдні ў РНПЦ псіхічнага здароўя для правядзення псіхіятрычнай экспертызы.

15 лістапада 2021 года ў Мінскім гарадскім судзе распачаўся працэс над Вольгай Залатар, якую абвінавацілі па наступных артыкулах Крымінальнага кодэкса: ч.1 арт. 361-1 (стварэнне экстрэмісцкага фарміравання); ч. 1 і 2 арт. 342 (арганізацыя і падрыхтоўка дзеянняў, якія груба парушаюць грамадскі парадак); ч. 1 арт. 16 ч. 1 арт. 342 (пасобніцтва да арганізацыі дзеянняў, якія груба парушаюць грамадскі парадак). 29 лістапада пракурорка Жанна Баранава запрасіла пакаранне для зняволенай шматдзетнай маці – пяць гадоў пазбаўлення волі ва ўмовах агульнага рэжыму. 

Як стала вядома з матэрыялаў справы, агучаных на судзе, Следчы камітэт вырашыў, што "заявы Залатар аб прычыненні ёй цялесных пашкоджанняў не адпавядаюць рэчаіснасці, паколькі яны мелі месца да яе затрымання".

30 лістапада 2021 Вольга выступіла ў судзе з апошнім словам. 3 снежня суддзя Анастасія Папко асудзіла Вольгу да чатырох гадоў пазбаўлення волі ва ўмовах агульнага рэжыму. Гэта на год менш, чым прасіла ў суда пракурорка Жанна Баранава. 

Чатыры гады калоніі — у Мінгарсудзе агучылі прысуд палітзняволенай маці пяцярых дзяцей Вользе Залатар

Гэта на год менш, чым прасіла ў суда пракурорка Жанна Баранава. На абвяшчэнні прысуду Вольга папрасіла суд агучыць усё абвінавачванне, што заняло паўтары гадзіны. Вольга не прызнала віну ні па адным артыкуле. 

"Я хачу міру для сваёй роднай краіны", — Вольга Залатар у апошнім слове

У Мінскім гарадскім судзе сёння з апошнім словам выступіла палітзняволеная маці пяцярых дзяцей Вольга Залатар. Учора пракурорка Жанна Баранава запрасіла ў суда пакаранне для яе – пяць гадоў пазбаўлення волі ва ўмовах агульнага рэжыму. Прысуд Вользе будзе вынесены 3 снежня. "Вясна" публікуе моцнае і шчымлівае апошняе слова палітзняволенай на судзе, якое яна прамовіла на беларускай мове.

Пракурорка запатрабавала пакараць шматдзетную маці Вольгу Залатар пяццю гадамі калоніі

У Мінскім гарадскім судзе 29 лістапада працягнуўся суд над палітзняволенай маці пяцярых дзяцей Вольгай Залатар.

Былы адвакат Вольгі Залатар: "Абследаванне пасля затрымання адкладалі да тых часоў, пакуль не зніклі сляды удараў"

"Адна з маіх кліентак, Вольга Залатар, была збітая праз некалькі гадзін пасля арышту, каб прымусіць яе даць паказанні супраць самой сябе. [...] Я ўбачыў на яе целе сляды катаванняў і адразу звярнуўся ў пракуратуру і Следчы камітэт. На сённяшні дзень — па сканчэнні больш за сем месяцаў — яны ўсё яшчэ не адказалі. Абавязковае медыцынскае абследаванне пасля затрымання адкладалі да тых часоў, пакуль не зніклі сляды удараў».

"Цялесныя пашкоджанні мелі месца да яе затрымання": якую пазіцыю заняў СК па збіваннях і катаваннях палітзняволенай Вольгі Залатар

На судзе дапыталі сведак і даследавалі пісьмовыя матэрыялы, падчас якіх агучылі заключэнні экспертаў і матэрыялы праверкі з нагоды цялесных пашкоджанняў у Вольгі пасля затрымання. Нагадаем, былы адвакат жанчыны Андрэй Мачалаў распавёў, што пасля затрымання ў ГУБАЗіКу Вольгу збівалі і выбівалі (у прамым сэнсе гэтага слова) паролі ад тэлефона.

"Арганізоўвала правядзенне сумеснага вольнага часу": у чым абвінавачваюць палітзняволеную маці пяцярых дзяцей

У Мінскім гарадскім судзе 15 лістапада распачаўся судовы працэс над палітзняволенай маці пяцярых дзяцей Вольгай Залатар, якую ўтрымліваюць пад вартай ужо восем месяцаў. У красавіку былы адвакат Залатар Андрэй Мачалаў заявіў, што падчас допытаў Вольгу збівалі і «выбівалі» паролі ад тэлефона. За гэтую заяву адваката пазбавілі ліцэнзіі. 

У Мінску супраць маці пяцярых дзяцей узбудзілі крымінальную справу за "заклікі да захопу ўлады"

“Вясна” сабрала ўсё, што вядома па гэтай справе: хто такая Вольга Залатар, як судзілі яе мужа Сяргея Ганкевіча і як пракаментавала затрыманне жанчыны міліцыя.

Вольга Залатар з "Валадаркі": Нягледзячы на высокія сцены і краты, я адчуваю сябе свабоднай

Вольга не прызнае сваёй віны і адмаўляецца супрацоўнічаць са следствам. Жанчына не губляе аптымізму, піша сваім дзецям і маці вялікія лісты на беларускай мове, у якіх распавядае пра быт у камеры, пра свае планы на Вялікдзень і дзеліцца сваім партрэтам з турмы аўтарства палітзняволенай студэнткі Касі Будзько. “Вясна” публікуе вытрымкі з лістоў Вольгі Залатар.

Дзень маці ў няволі: гісторыі жанчын, якія апынуліся па той бок кратаў ад сваіх дзяцей

За кратамі сёння знаходзяцца журналісткі, студэнткі, праваабаронцы, валанцёркі, актывісткі і жанчыны самых розных прафесій. Акрамя гэтага, ў зняволенні знаходзяцца шмат тых, каго на волі чакаюць дзеці. У Дзень маці "Вясна" ўзгадвае гісторыі жанчын, якія апынуліся па той бок кратаў ад сваіх дзяцей, а некаторыя – наогул разам з дзецьмі за кратамі.