Вітольд Міхайлавіч Ашурак — актывіст з Бярозаўкі, сябра Партыі БНФ. Каардынатар руху «За свабоду». Не раз балятаваўся ў мясцовыя дэпутаты і парламент. Падымаў экалагічныя пытанні: ён змагаўся супраць шкоднай вытворчасці шкловаты. Разам з паплечнікамі ўшаноўваў мясціны паўстанцаў Каліноўскага: яны ставілі крыжы на месцы пахавання паўстанцаў па ўсёй Гарадзеншчыне. Зрабілі помнік паміж вёскамі. 

Доўгі час працаваў выдзімальнікам на шклозаводзе, рабіў рамонт кватэр.

Палітыкай Вітольд зацікавіўся 10 гадоў таму. Знянацку вырашыў паехаць на Плошчу-2010. Атрымаў свае першыя 12 дзён арышту. Пасля выхаду адразу ўступіў у партыю БНФ, стаў сябрам сойму БНФ. Пачаў гаварыць па-беларуску.

Вітольд Ашурак меў сярэднюю адукацыю. «Калі ў яго пыталіся, якая ў яго адукацыя, ён любіў паўтараць: „Мая адукацыя найлепшая — я самавук“. Ён вельмі гісторыяй цікавіўся, гісторыяй мастацтва. Горы кніг пра гэта прачытаў. Турызмам цікавіўся. Мы ж кожны год сплаўляемся на плытах па Нёмане», — прыгадвае лідскі актывіст, сябра Ашурка Сяргей Пантус.

«Вітольд — гэта адзін з самых прынцыповых, сумленных і сапраўдных людзей, з якімі я знаёмая. Мне здаецца, што ў свабоднай Беларусі ён будзе сапраўды вялікім рэгіянальным палітыкам», — выказалася пра Вітольда ягоная паплечніца і сяброўка Вольга Быкоўская.

Яго абвінавацілі паводле ч. 1 арт. 342 (Удзел у групавых дзеяннях, што груба парушаюць грамадскі парадак) і арт. 364 (Гвалт у дачыненні да супрацоўніка міліцыі) Крымінальнага кодэкса.

Без тлумачэння канкрэтных прычын суддзя Максім Філатаў абвясціў суд закрытым, спаслаўшыся на 23 артыкул Канстытуцыі і “пагрозу дзяржаўнай бяспецы”. 18 студзеня 2021 года ён прысудзіў Ашурку 5 гадоў калоніі агульнага рэжыму.

«Я нікога не забіў, нікога не падмануў, нічога ня скраў. Я рабіў так, як патрабуе маё сумленне», — прыгадвае словы Вітольда Сяргей Пантус.

«Вось ужо тры месяцы я ў турме. І я ўважліва прыслухоўваюся да сябе — ці не стаў я менш свабодны ў інтэр’ерах з тоўстымі сценамі і жалезнымі дзвярыма з "кармушкай"? Ці пазбавіў мяне будынак былога езуіцкага калегіума свабоды маіх думак? Мае ворагі забралі ў мяне магчымасць бачыцца з роднымі, з жонкай, з сябрамі, але яны не маюць магчымасці прыставіць міліцыянта да маіх думак! Я па-ранейшаму свабодны адрозніваць чорнае ад белага і любіць сваю Айчыну Беларусь!» — так напісаў Вітольд у лісце ў рэдакцыю газеты «Новы час».

21 траўня 2021 года Вітольд Ашурак памёр у шклоўскай калоніі. Афіцыйная прычына — спыненне сэрца. Яму было 50 гадоў.

"Давесці да канца справу Вітольда важна для ўсяго грамадства", — Андрэй Ашурак

"Вясна" паразмаўляла Андрэем Ашуркам пра сведчанні вязняў, а таксама пра расследаванне справы і аднаўленне справядлівасці.

"Мораць голадам і холадам". Новыя сведчанні пра катаванні і акалічнасці смерці Вітольда Ашурка ў ПК-17

Папраўчая калонія № 17 у Шклове лічыцца адным з самых жорсткіх месцаў пазбаўлення волі ў Беларусі. Цяпер там утрымліваецца мінімум 78 палітзняволеных. Гэта калонія вядомая тым, што ў 2021 годзе там памёр 50-гадовы палітзняволены актывіст Вітольд Ашурак. Крымінальная справа па факце яго смерці дагэтуль не ўзбуджана. Адзін з былых вязняў на ўмовах ананімнасці (яго імя ёсць у распараджэнні праваабаронцаў) распавёў "Вясне" пра катаванні і здзекі са зняволеных паводле палітычных матываў, абставіны смерці Вітольда Ашурка і ціск на Паўла Севярынца.

"Мэтай было не забіць, а зламаць маральна". Яшчэ адзін былы вязень шклоўскай калоніі расказаў сваю версію смерці Вітольда Ашурка

"Вязні, з якімі я перасякаўся, кажуць, што Вітольда білі. Бо ён, бадай, адзіны быў у калоніі, хто мог адкрыта выказваць свае думкі і сваё стаўленне да адміністрацыі. Ён называў іх адкрыта здраднікамі і ворагамі", — кажа былы зняволены.

Акцыі салідарнасці па ўсім свеце: як прайшоў Дзень палітвязня ў Беларусі

21 траўня, у абвешчаны праваабаронцамі “Вясны” Дзень палітвязня ў Беларусі, акцыі памяці пра загінулага ў калоніі Вітольда Ашурка і ў знак салідарнасці з больш чым 1200 палітзняволенымі прайшлі ў розных гарадах і краінах свету.

На судзе і ў труне. Падкаст памяці Вітольда Ашурка – палітвязня, які памёр у калоніі

Мінуў год, як у шклоўскай калоніі пры нявысветленых абставінах памёр палітвязень Вітольд Ашурак. Гэта было 21 траўня 2021 года. Таму 28-ы выпуск падкаста “Вясна прыйдзе” прысвячаецца Вітольду, а таксама людзям, на якіх ён паўплываў — і пры жыцці, і пасля смерці.

"Спыняцца ніхто не збіраецца". Распавядаем, што цяпер з расследаваннем смерці ў калоніі Вітольда Ашурка

Што цяпер з праверкай па факту смерці ў калоніі Вітольда Ашурка, ці ёсць спадзевы на ўзбуджэнне крымінальнай справы і прыцягнення да адказнасці вінаватых, якая практыка па падобных справах у Беларусі — пра гэта распавялі брат Вітольда Андрэй Ашурак і праваабаронца "Вясны" Павел Сапелка.

Застанецца свабодным навечна. У зняволенні памёр Вітольд Ашурак

Пайшоў з жыцця палітвязень з Бярозаўкі Вітольд Ашурак, якому 18 студзеня ў Лідзе на закрытым працэсе прысудзілі да 5 гадоў калоніі агульнага рэжыму.

"У снах да мяне прыходзіць маці"

Гісторыя палітвязня Вітольда Ашурка.

Справа Вітольда Ашурка

Па двух артыкулах — пяць гадоў калоніі.

Суд па крымінальнай справе актывіста Ашурка зрабілі закрытым з-за "пагрозы дзяржаўнай бяспецы"

Сёння, 28 снежня, у Лідзе пачаўся разгляд крымінальнай справы ў дачыненні актывіста з Бярозаўкі, сябра Партыі БНФ Вітольда Ашурка.