Віктар Міхайлавіч Таўгень - жыхар Маладзечна, абвінавачаны паводле ч. 1 арт. 342 Крымінальнага кодэксу (Актыўны ўдзел у групавых дзеяннях, груба парушаючых грамадскі парадак). 

А менавіта, згодна з тэкстам абвінавачвання, увечары 9 жніўня, калі ў горадзе праходзіла акцыя пратэсту, ён груба парушаў грамадскі парадак, а менавіта "махаў рукамі, уключаў гучна музыку на магнітафоне, ствараў штучнае асвятленне ліхтарыкам". 

На судзе Таўгень сваёй віны не прызнаў, бо не лічыў, што сваімі дзеяннямі ён парушаў грамадскі парадак. Заўваг як з боку міліцыі, так і з боку грамадзян у той дзень ён не атрымліваў. Але суддзя Іна Каханоўская 22 лютага 2021 года прысудзіла Віктару два гады абмежавання волі з накіраваннем у папраўчую ўстанову адкрытага тыпу ("хімія"). 

20 сакавіка 2021 года Віктар паехаў адбываць пакаранне ў папраўчую ўстанову №45 (Камянецкі раён).

Быў унесены ў пералік грамадзян Беларусі, замежных грамадзян і асоб без грамадзянства, якія маюць дачыненне да экстрэмісцкай дзейнасці.

У сакавіку 2023 г. палітвязень выйшаў на волю, цалкам адбыўшы тэрмін.

У Маладзечне судзяць яшчэ аднаго ўдзельніка акцыі 9 жніўня. За тое, што трымаў музычную калонку

У судзе Маладзечанскага раёна пачаўся разгляд крымінальнай справы, заведзенай супраць мясцовага жыхара Віктара Таўгеня паводле артыкула 342 Крымінальнага кодэкса за ўдзел у акцыі пратэсту 9 жніўня ў горадзе. Справу разглядае суддзя Іна Каханоўская, дзяржаўны абвінаваўца Балоціна. Інтарэсы Таўгеня прадстаўляе адвакат Анатоль Клімовіч.

На два гады "хіміі" асудзілі маладзечанца, які трымаў музычную калонку на акцыі 9 жніўня

У судзе Маладзечанскага раёна 22 лютага 2021 года быў вынесены прысуд па крымінальнай справе мясцовага жыхара Віктара Таўгеня паводле артыкула 342 Крымінальнага кодэкса за ўдзел у акцыі пратэсту 9 жніўня ў горадзе. Суддзя Іна Каханоўская прысудзіла Віктару два гады абмежавання волі з накіраваннем у папраўчую ўстанову адкрытага тыпу ("хімія"). Менавіта такое пакаранне запрасіў падчас спрэчак пракурор.