Віктар Аляксандравіч Фянчук — арнітолаг, супрацоўнік і колішні кіраўнік "Аховы птушак Бацькаўшчыны" (у 2006-2014 гг.). Быў затрыманы дома 31 жніўня 2021 года. Яму прысудзілі 12 сутак адміністрацыйнага арышту паводле артыкулу аб непадпарадкаванні міліцыі. 

Але пасля арышту ён не выйшаў на волю — яго затрымалі па крымінальнай справе аб групавых дзеяннях, якія груба парушаюць грамадскі парадак (ч. 1 арт. 342 Крымінальнага кодэксу). Згодна з матэрыяламі справы, "Фянчук блакаваў рух транспарту на праезнай частцы і выкрыкваў розныя лозунгі. Падчас расследавання выяўлена яшчэ пяць аналагічных эпізодаў, здзейсненых ім".

Матэрыялы следства на пачатку красавіка 2022 былі перададзеныя ў пракуратуру. Разгляд справы пачаўся 6 траўня ў судзе Маскоўскага раёна Мінска. 10 траўня дзяржабвінавачанне запрасіла для Віктара 2,5 гады зняволення і 196 тысяч рублёў кампенсацыі "Мінсктрансу". Менавіта такое пакаранне 12 траўня і прысудзіла Віктару суддзя Кацярына Мурашка.

У чэрвені 2022 г. Віктара перавялі з СІЗА-1 у магілёўскую Турму № 4.

5 жніўня 2022 г. адбыўся разгляд апеляцыйнай скаргі: прысуд Віктара быў пакінуты без зменаў. Неўзабаве палітвязня этапавалі ў магілёўскую ПК № 15.

МУС 4 лістапада 2022 г. уключыла палітвязня ў "Пералік асобаў, датычных да экстрэмісцкай дзейнасці".

29 верасня 2023 г. выйшаў на волю. 

Экс-кіраўніка «Аховы птушак Бацькаўшчыны» Віктара Фенчука асудзілі да 2,5 гадоў калоніі

Згодна з матэрыяламі справы, «Фянчук блакаваў рух транспарта на праезнай частцы і выкрыкваў розныя лозунгі. Падчас расследавання выяўлена яшчэ пяць аналагічных эпізодаў, здзейсненых ім». Па словах пракурора, «такія паводзіны чалавека, які прадстаўляе Беларусь на міжнароднай арэне, проста недапушчальныя».