Вадзім Сяргеевіч Гурман нарадзіўся ў Маладзечне ў 1999 годзе. Яго абвінавацілі па двух артыкулах Крымінальнага кодэксу: ч. 1 арт. 342 (Арганізацыя або актыўны ўдзел у групавых дзеяннях, якія груба парушаюць грамадскі парадак) і арт. 364 (Гвалт альбо пагроза прымянення гвалту ў дачыненні да супрацоўніка органаў унутраных спраў).

Згодна з абвінавачваннем, 9 жніўня Гурман актыўна ўдзельнічаў у несанкцыянаваным масавым мерапрыемстве і не падпарадкоўваўся супрацоўнікам органаў унутраных спраў. Гурман выкрыкваў лозунгі, правакаваў грамадзян на актыўныя дзеянні, а таксама пагражаў гвалтам міліцыянерам Смаленскаму, Лазару, Радзько, Сіняўскаму, Нехвядовічу, Цярэньцьеву.

На судзе Гурман прызнаў віну па артыкуле 342, але не па 364-м. Ён распавёў, што пры затрыманні АМАПам, якое адбылося праз два дні 11 жніўня, яго і іншых білі і залілі газам твар. Затым моцнае збіццё працягнуліся ў двары РУУС. Па словах Гурмана, яму пагражалі згвалтаваннем і спрабавалі зняць штаны, аднак усё ж спыніліся па камандзе кагосьці з кіраўніцтва РАУС.

8 лютага 2021 года ў судзе Маладзечанскага раёна суддзя Вольга Дубовік прысудзіла Гурману тры гады і шэсць месяцаў пазбаўлення волі ў калоніі агульнага рэжыму.

Палітвязень у горацкай калоніі № 9 прызнаны "злосным парушальнікам рэжыму". У сярэдзіне студзеня 2022 з'явілася інфармацыя аб тым, што Вадзім на пяць месяцаў быў змешчаны ў памяшканне камернага тыпу.

За першыя некалькі месяцаў 2023 г. ён адбыў як мінімум 35 сутак у ШІЗА, 21 з якіх — бесперапынна. Апошнія 14 сутак яму прызначылі за адмову зняцца ў відэа для камісіі па памілаванні, падчас якога трэба было прызнаць сваю віну: палітвязень прынцыпова адмовіўся, бо не лічыць сябе вінаватым. Былыя вязні ў сярэдзіне красавіка 2023 г. распавялі, што хлопца перад Вялікднем зноў змясцілі ў ПКТ тэрмінам на шэсць месяцаў, дзе будуць утрымліваць аднаго ўвесь час.

Вядома, што ў красавіку 2023 г. супрацоўнікі калоніі збівалі хлопца нагамі на працягу шасці гадзінаў, а потым халоднай вадой прыводзілі яго ў пачуцці. Супрацоўнікі нават суправаджаюць Вадзіма ў калоніі, каб той не камунікаваў з іншымі вязнямі. У яго вельмі моцна пагоршылася здароўе, хлопец амаль нічога не бачыць.

Напрыканцы снежня 2023 г. стала вядома, што Вадзім 8 месяцаў адбыў у ПКТ. Па выхадзе яго адразу пазбавілі перадач, доўгатэрміновага і кароткатэрміновага спаткання. Таксама вязню забараняюць паведамляць на волю пра свой стан здароўя. У яго было толькі адно тэлефанаванне за той час. 

У пачатку красавіка 2024 г. выйшаў на волю.

Палітвязня Вадзіма Гурмана, які мае сур’ёзныя праблемы са зрокам, катуюць у горацкай калоніі

У лютым у яго выявілі пупочную кілу (выпінанне органаў унутранай паражніны праз пярэднюю сценку жывата з прычыны слабасці цягліц зоны пупочнага кольца). Але начальнік калоніі Сяргей Петраковіч адмовіў Вадзіму ў аперацыі па выдаленні кілы. Аднак, нягледзячы на сурёзныя праблемы са здароўем, Вадзім працягваў працаваць на леспрамзоне — разгружаў дрэва з вагонаў.

Жыхара Маладзечна судзяць за ўдзел у акцыі 9 жніўня і заклікі да гвалту

У судзе Маладзечанскага раёна праходзіць разгляд крымінальнай справы па падзеях 9 жніўня. Маладзечанца Вадзіма Гурмана абвінавачваюць у тым, што ён правакаваў натоўп на актыўныя дзеянні супраць міліцыі і ў пагрозах гвалтам міліцыянерам.

Абвінавачаны маладзечанец Гурман пра сваё затрыманне: "Пагражалі згвалтаваннем, спрабавалі зняць штаны".

У судзе Маладзечанскага раёна 19 студзеня прадоўжыўся разгляд крымінальнай справы маладзечанца Вадзіма Гурмана па падзеях 9 жніўня ў горадзе.

Маладзечанца Вадзіма Гурмана асудзілі на 3,5 гады калоніі за акцыю 9 жніўня

Восьмага лютага ў судзе Маладзечанскага раёна быў вынесены прысуд Вадзіму Гурману, абвінавачанаму па ч. 1 арт. 342 Крымінальнага кодэксу і па арт. 364 КК, за тое, што нібыта правакаваў натоўп на актыўныя дзеянні супраць міліцыі і пагражаў гвалтам міліцыянерам на акцыі 9 жніўня.