Уладзіслаў Дзмітрыевіч Усцін - менчук, асуджаны на 3 гады абмежавання волі з накіраваннем ("хімія") па артыкуле за гвалт у дачыненні да міліцыянта. Крымінальная справа на Уладзіслава была заведзена па падзеях 14 ліпеня ў Мінску, калі людзі выйшлі на стыхійную акцыю пратэста. 

Першы раз Усціна затрымалі 14 ліпеня каля плошчы Перамогі з боку музея "Дом РСДРП". У той вечар малады чалавек вяртаўся дадому пасля сумоўя па працаўладкаванні. Яго схапілі, кінулі ў аўтазак і там збівалі. Раніцай яго вызвалілі без пратакола, аднак 16 ліпеня затрымалі зноў на працы. 

Ён з'яўляўся падазраваным па артыкуле 342 (Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх) і 364 Крымінальнага кодэкса (Гвалт у дачыненні да супрацоўніка АУС). Пазней справа па арт. 342 была спынена. Два месяцы пасля затрымання хлопца трымалі пад арыштам у СІЗА-1.

25 лістапада 2020 года Уладзіславу Усціну было прызначана пакаранне ў выглядзе 3 гадоў абмежавання волі з накіраваннем ў папраўчую ўстанову адкрытага тыпу. 21 сакавіка 2021 года ён накіраваўся адбываць пакаранне ў ПУАТ №7 у Пружанскім раёне.

22 жніўня 2021 года Уладзіслаў уцёк з "хіміі" і пакінуў Беларусь.

Стала вядома імя яшчэ аднаго затрыманага за "гвалт у дачыненні да супрацоўніка ОУС"

Мінчук Уладзіслаў Усцін у свой 21-ы дзень народзінаў быў затрыманы ў сувязі з крымінальнай справай, распачатай паводле артыкула 364 КК РБ (Гвалт альбо пагроза ўжывання гвалту ў дачыненні да супрацоўніка органаў унутраных спраў) паводле падзей 14 ліпеня.

За штуршок у спіну АМАПаўца 14 ліпеня мінчука асудзілі да трох гадоў "хіміі"

Суд Цэнтральнага раёна Мінска разгледзеў чарговую крымінальная справа за пратэстныя акцыі 14 ліпеня. Следчы камітэт тады распачаў тры крымінальныя справы: паводле артыкула 363, 364 і 342 Крымінальнага кодэкса. У рамках крымінальных справаў былі затрыманыя два 21-гадовыя мінчукі – Антон Лакішык і Уладзіслаў Усцін. Іх падазравалі таксама па артыкуле 342 КК, аднак судзілі толькі за гвалт у дачыненні да супрацоўнікаў АМАПа. Антона Лакішыка 18 лістапада асудзілі на тры гады калоніі за патасоўку з АМАПаўцам на Нямізе. Праз тыдзень, 25 лістапада, да трох гадоў «хіміі» асудзілі Уладзіслава Усціна за штуршок супрацоўніка АМАПу на плошчы Перамогі. Частка судовага паседжання праходзіла ў закрытым рэжыме – з-за вывучэння відэа-доказа з тэлеграм-канала NEXTA, які прызнаны беларускімі ўладамі экстрэмісцкім. Крымінальныя справы хлопцаў разглядала суддзя Вікторыя Шабуня, а дзяржабвінавачанне падтрымліваў памочнік пракурора Цэнтральнага раёна Мінска Арцём Цвяткоў.