Уладзімір Чыжэўскі — жыхар Астраўца, асуджаны за абразу Аляксандра Лукашэнкі і былога міністра ўнутраных спраў Юрыя Караева.

Згодна з прад'яўленым абвінавачваннем, Уладзімір Чыжэўскі 1 верасня 2020 года ў групе “Астравец для жыцця” ў тэлеграме пракаментаваў відэа, у якім Лукашэнка даў ацэнку дзеянням улады адносна мітрапаліта Кандрусевіча. Пры гэтым ужыщ ненарматыўнае слова “д…”. А 28 кастрычніка ён у той жа групе пракаментаваў відэа, у якім міністр МУС Караеў казаў, у які момант небяспекі міліцыянер мусіць вырашаць пытанне аб выкарыстанні зброі. У каментары таксама ўжыў ненарматыўнае слова і словазлучэнне.  І пазней дадаў негатыўную ацэнку словазлучэннем “не мае права называцца чалавекам”.

18 студзеня суд Астравецкага раёна ў складзе суддзі Дзмітрыя Багдановіча, з удзелам дзяржаўнага абвінаваўцы Аляксея Тамчанка разгледзеў крымінальную справу па абвінавачванню Чыжэўскага ў здзяйсненні злачынстваў, прадугледжаных ч.1 арт. 368 (абраза прэзідэнта) і арт. 369 (абраза прадстаўніка ўлады).

У выніку па двух эпізодах Чыжэўскаму прысудзілі 1 год і 3 месяцы калоніі агульнага рэжыму.