Сцяпан Мікалаевіч Дрозд у судзе Ленінскага раёна Брэста 21 кастрычніка 2021 года быў прызнаны вінаватым паводле ч. 2 арт. 293 Крымінальнага кодэкса (удзел у масавых беспарадках) і асуджаны да чатырох гадоў калоніі. Мужчыну абвінавацілі ў замахах (але не ўдарах) рукамі, адным удары па міліцэйскім шчыце, які, у сваю чаргу, зачапіў нагу супрацоўніка АУС Паліводы.

У сваім апошнім слове Сцяпан Дрозд быў кароткі:

"Я казаў, што не згодны з тым, што мне прад'явілі. Ніякіх супрацьпраўных дзеянняў я не здзяйсняў. Я проста не магу зразумець, як дзеці будуць расці без мяне. Чалавека пакараць можна за нейкія імгненні, але гэта пакаранне — яно неабгрунтаванае. Я лічу, што Высокі суд неяк улічыць гэта і вынесе правільны прысуд. Мне больш сказаць няма чаго".

Ён апынуўся ў трэцяй групе, асуджанай па "пінскай справе" — агулам за ўдзел у акцыях пратэсту ў Пінску з 9 на 10 жніўня пазбавілі волі 26 чалавек.

Знаходзіўся ў СІЗА-7, у канцы снежня 2021 быў пераведзены ў магілёўскую ПК № 15, а ў студзені 2022-га — у ПК № 1.

Па падліках, выйшаў на волю 10 снежня 2023 г. 

Да трох з паловай і чатырох гадоў калоніі асудзілі яшчэ двух фігурантаў "пінскай справы"

"Вясна" распавядае, што вядома пра суд над трэцяй групай фігурантаў гэтай гучнай справы.