Сафія Андрэеўна Сапега — студэнтка Еўрапейскага гуманітарнага ўніверсітэту, грамадзянка Расійскай Федэрацыі. 

23 траўня Сафія вярталася з адпачынку ў Грэцыі разам з блогерам Раманам Пратасевічам. Самалёт авіякампаніі Ryanair, у якім яны ляцелі, прымусілі зрабіць пасадку ў Нацыянальным аэрапорце "Мінск". Там Сафію і Рамана затрымалі.

Сафію Сапегу ўтрымлівалі ў СІЗА КДБ, а 24 чэрвеня 2021 г. перавялі на хатні арышт. У верасні стала вядома, што ёй працягнулі арышт да 25 снежня.

20 снежня 2021 г. стала вядома, што Сафіі выставілі канчатковае абвінавачванне паводле сямі артыкулаў Крымінальнага кодэксу: ч. 3 арт. 130 (распальванне варожасці ў складзе групы асоб); ч. 4 арт. 16 і 364 (арганізацыя гвалту і пагроз у дачыненні да міліцыянтаў); ч. 4 арт. 16 і 365 (пагрозы, паклёп ці распаўсюд звестак пра міліцыянтаў); ч. 4 арт. 16 і 366 (арганізацыя гвалту і пагроз у дачыненні да службовых асоб); ч. 4 арт. 16 і 389 (арганізацыя пагрозы забойствам ці гвалту ў дачыненні да суддзяў); ч. 4 арт. 16 і 198 (перашкода дзейнасці журналістаў з пагрозай ужывання гвалту); ч. 1 і 2 арт. 203-1 (наўмысны збор інфармацыі і персанальных звестак іншай асобы).

У канцы снежня 2021 ейная справа была накіраваная ў суд. Айчым дзяўчыны Сяргей Дудзіч 21 снежня 2021 года паведаміў, што Сафія напісала прашэнне аб памілаванні на імя Лукашэнкі.

Разгляд справы дзяўчыны распачаўся 28 сакавіка 2022 года ў Гродзенскім абласным судзе ў закрытым рэжыме. Расследаванне праводзілася ў Мінску, але справа перададзеная на разгляд у Гродна, магчыма, таму што Сапега прапісаная ў г. Ліда Гродзенскай вобласці.

6 траўня 2022 г. быў вынесены прысуд: Сафія была прызнаная вінаватай паводле двух артыкулаў КК — ч. 3 арт. 130 (распальванне варожасці ў складзе групы асоб) і ч. 1 арт. 179 (незаконны збор інфармацыі пра прыватнае жыццё) і асуджаная да пазбаўлення волі на тэрмін 6 гадоў з адбываннем пакарання ў папраўчай калоніі ва ўмовах агульнага рэжыму. Прысудам суда з абвінавачанай на карысць пацярпелых спагнаная матэрыяльная кампенсацыя маральнай шкоды на агульную суму 167 500 рублёў. Пацярпелымі па справе Сафіі прызнаныя 223 чалавекі. Вядома, што пазней сям'я выплаціла ўсю суму кампенсацыі маральнай шкоды.

Мера стрымання змененая з хатняга арышту на заключэнне пад варту. 25 траўня 2022 г. прысуд Гродзенскага абласнога суда ў дачыненні да Сапегі не быў абскарджаны і набыў законную моц.

На пачатку чэрвеня 2022 года Сафію этапавалі з Турмы № 1 у гомельскую калонію № 4, дзе яна працуе швачкай. У канцы месяца дзяўчына перадала адміністрацыі ПК № 4 хадайніцтва аб памілаванні.

У жніўні 2022 г. з'явілася інфармацыя, што Сафію пазбавілі спаткання з роднымі — нібыта за тое, што яна падзялілася з кімсьці цыгарэтай. Таксама дзяўчыну — грамадзянку РФ — пазбавілі віда на жыхарства ў Беларусі.

На пачатку студзеня 2023 г. стала вядома, што Сафіі было адмоўлена ў памілаванні.

14 сакавіка 2023 г. КДБ дадаў палітзняволеную ў "спіс асобаў, якія маюць дачыненне да тэрарыстычнай дзейнасці".

Адвакат Сафіі паведаміў на пачатку красавіка 2023 г., што палітзняволеная будзе адбываць пакаранне ў Расіі.

Справу супраць Сафіі Сапегі ў канцы красавіка 2023 г. зарэгістравалі ў раённым судзе Масквы: у расійскім Крымінальным кодэксе няма аналагу артыкула аб незаконным зборы інфармацыі аб прыватным жыцці (ч. 1 арт. 179 КК). У картцы справы на сайце суда пазначаны артыкул аб перавышэнні паўнамоцтваў прыватным дэтэктывам або работнікам прыватнай ахоўнай арганізацыі пры выкананні імі сваіх службовых абавязкаў (ч. 1 арт. 203 КК РФ).

7 чэрвеня 2023 г. Сафія была вызвалена па памілаванні. Яна прабыла ў зняволенні 2 гады і 14 дзён. 

Вынесены прысуд палітзняволенай грамадзянцы Расіі Сафіі Сапезе — шэсць гадоў калоніі і 167,5 тысячы рублёў кампенсацыі

Паводле версіі следства, расіянка "сумесна з іншымі асобамі, у тым ліку замежнымі грамадзянамі", адміністравала неназваныя тэлеграм-каналы. Усяго ў тэлеграм-канал размясцілі персанальныя дадзеныя не менш 238 чалавек, сярод якіх сілавікі, пракурорскія работнікі, суддзі і дзяржслужачыя. Як пісала Генпракуратура, пасля публікацыі ў адрас пацярпелых пачалі паступаць пагрозы.

У Гродне пачаўся суд над палітзняволенай грамадзянкай Расіі Сафіяй Сапегай

Пракуратура сцвярджала, што Сапега выканала абавязальніцтвы, прадугледжаныя заключанай з ёй дамовай аб супрацоўніцтве, і прыняла меры аб выплаце даходаў, атрыманых злачынным шляхам. Таксама дзяўчына напісала прашэнне аб памілаванні на імя Лукашэнкі.

Што вядома пра дзяўчыну Рамана Пратасевіча, якую затрымалі разам з ім у мінскім аэрапорце

Сафія Сапега з’яўляецца грамадзянкай Расіі і вучыцца ў ЕГУ на праграме «Міжнароднае права і права Еўрапейскага саюза». У гэтым годзе яна абараняе дыплом. Зараз, паводле Святланы Ціханоўскай, дзяўчына знаходзіцца на Акрэсціна. Што ёй прад’яўляюць, невядома.