Павел Міхайлавіч Дворак — жыхар Мазыра, футбольны фанат, затрыманы 4 траўня з дапамогай ГУБАЗіКу і САХР. Яму прад'явілі абвінавачванне па ч. 1 арт. 342 Крымінальнага кодэксу (Арганізацыя альбо актыўны ўдзел у групавых дзеяннях, якія груба парушаць грамадскі парадак). Гэтая крымінальная справа распачата за акцыі пратэсту, якія адбываліся ў горадзе ў жніўні 2020 года пасля прэзідэнцкіх выбараў. Павел быў узяты пад варту і ўтрымліваўся ў СІЗА № 3 Гомеля. 

23 лістапада 2021 года суддзя Галіна Кніжонак пакарала Паўла Дворака, Данііла Скіпальскага, Аляксандра Сузько, Аляксандра Цімашэнку пазбаўленнем волі тэрмінам на тры гады ў калоніі агульнага рэжыму, Кірыла Канапацкага — пазбаўленнем волі на тры гады і шэсць месяцаў. Таксама была прызначаная матэрыяльная кампенсацыя пацярпеламу начальніку аддзялення Дзяржаўтаінспекцыі Валянціну Пілеру ў памеры 1500 рублёў з кожнага асуджанага.

У сярэдзіне траўня 2022 г. стала вядома, што Паўла этапавалі з СІЗА № 3 у наваполацкую калонію № 1.

Выйшаў на волю 28 кастрычніка 2023 г. 

Футбольных заўзятараў з Мазыра прысудзілі да пазбаўлення волі

Суд Мазырскага раёна 23 лістапада вынес прысуд па справе мясцовых футбольных заўзятараў Данііла Скіпальскага, Аляксандра Сузько, Паўла Дворака, Аляксандра Цімашэнкі і Кірыла Канапацкага.

Масавыя затрыманні футбольных заўзятараў у Мазыры. Што вядома на гэты час

Пра 11 затрыманых у Мазыры 5 траўня паведаміла прэсавая служба МУС. Паводле версіі сілавікоў, 10 хлопцаў, якіх затрымалі 4 траўня з дапамогай ГУБАЗіКу і САХР, бралі ўдзел у масавых беспарадках у жніўні 2020 года.