Мікіта Міхайлавіч Кочур — інжынер з Мінска. Быў асуджаны па ч. 2 арт. 363 Крымінальнага кодэксу (Супраціў міліцыі з выкарыстаннем гвалту) на 4 гады пазбаўлення волі. 

Увечары 11 жніўня 2020 года, калі ў Мінску праходзілі акцыі пратэсту супраць вынікаў прэзідэнцкіх выбараў, Мікіта Кочур сустрэўся з братам і ягонай жонкай на вуліцы Някрасава, каб паказаць нядаўна набыты матацыкл. Да іх пад'ехала міліцыя, супрацоўнікі ДАІ падышлі да Кочура і сталі патрабаваць у яго дакументы. Кочур, у сваю чаргу, папрасіў супрацоўнікаў прадставіцца і паказаць службовыя пасведчанні. У выніку Мікіту сцягнулі з матацыкла, павалілі на зямлю, збілі дубінкамі і затым павезлі ў РУУС.

Пазней на Мікіту Кочура завялі крымінальную справу па ч. 2 арт. 363 Крымінальнага кодэкса (Супраціў супрацоўнікам міліцыі пры выкананні, спалучанае з прымяненнем гвалту). 20 лістапада 2020 года яго ўзялі пад варту. Пацярпелымі па крымінальнай справе былі прызнаныя начальнік УУС Савецкага раёна Сяргей Каліннік, старшы інспектар ДАІ Савецкага раёна Яўген Крыварот, супрацоўнікі міліцыі Невяровіч і Надзёжны. 

Згодна з прад'яўленым абвінавачаннем, па патрабаванні супрацоўнікаў міліцыі Кочур адмовіўся прад'явіць дакументы і падаць да агляду транспартны сродак (матацыкл «Хонда»), таксама адмовіўся прайсці ў Савецкае РУУС для высвятлення асобы. Замест гэтага ён аказаў супраціў супрацоўнікам міліцыі - штурхаў і наносіў удары, парваў аднаму з іх кашулю. А палкоўнік Сяргей Каліннік упаў ад штуршка Качура і атрымаў траўму локця. Але ніхто з іншых пацярпелых не бачыў, каб Кочур наносіў Калінніку нейкія ўдары. Мікіта Кочур сваёй віны ў злачынстве не прызнаў.

19 сакавіка 2021 года ў судзе Заводскага раёна Мінска абвясцілі прысуд Кочуру: 4 гады пазбаўлення волі з адбываннем пакарання ў калоніі агульнага рэжыму. Адбываў пакаранне ў ПК № 22. 

Па падліках, выйшаў на волю 16 верасня 2024 г. 

Менчука асудзілі на 4 гады калоніі за супраціў пры затрыманні. Суд вырашыў, што ён траўмаваў начальніка Савецкага РУУС

У судзе Заводскага раёна Мінска 19 сакавіка абвясцілі прысуд 23-гадоваму інжынеру Мікіту Кочуру, абвінавачанаму па ч. 2 арт. 363 Крымінальнага кодэкса (Супраціў супрацоўніку міліцыі пры выкананні, спалучанае з прымяненнем гвалту). Суддзя Анжэла Касцюкевіч прызнала Кочура вінаватым і прысудзіла яму 4 гады пазбаўлення волі з адбываннем пакарання ў калоніі агульнага рэжыму. Напярэдадні пракурор Вольга Дзіндзілевіч запрасіла для яго менавіта такое пакаранне. "Вясна" з дапамогай валанцёраў вяла маніторынг гэтага судовага працэсу, расказваем яго падрабязнасці.