Міхаіла Уладзіміравіча Зубкова абвінавацілі ў гвалце над супрацоўнікамі міліцыі (арт. 364 Крымінальнага кодэкса).

47-гадовага Міхаіла Зубкова затрымалі 29 кастрычніка 2021 раніцай у маскоўскім метро. Яго спынілі для праверкі пашпарта, і высветлілася, што беларус — у вышуку.

Пазней стала вядома прычына затрымання. Міхаіл Зубкоў у 2020 годзе удзельнічаў у маршах пратэсту ў Гомелі, яго затрымліваў АМАП. Тады мужчына правёў 15 сутак у ІЧУ. Больш да яго прэтэнзій з боку міліцыі не было і Міхаіл з'ехаў на працу ў Маскву.

3 траўня 2022 года Еўрапейскі суд па правах чалавека забараніў расейскім уладам экстрадаваць Зубкова, яго адвакат Роза Магамедава («Грамадзянскае садзейнічанне») апавясціла пра гэта дзяржорганы. Зубкова павінны былі вызваліць — тэрмін арышту мінаў 14 траўня 2022. Тым не менш, а 10-й раніцы 13 траўня 2022 яго сілком экстрадавалі ў Беларусь.

Суд Цэнтральнага раёна Гомеля 18 жніўня 2022 г. прызнаў Міхаіла Зубкова вінаватым у гвалце і пагрозах яго ўжывання ў дачыненні да супрацоўнікаў органаў унутраных спраў у мэтах перашкоджання іх законнай дзейнасці і прызначыў пакаранне ў выглядзе трох гадоў пазбаўлення волі ў папраўчай калоніі агульнага рэжыму.

Паводле наяўнай інфармацыі, палітвязень у сакавіку 2023 г. абвясціў галадоўку ў ШІЗА калоніі № 14 на знак пратэсту супраць незаконнага змяшчэння ў штрафны ізалятар.

Як стала вядома, вязня змясцілі ў ШІЗА другі раз за тое, што ён папрасіў у адміністрацыі калоніі выклікаць да яго натарыўса, каб заверыць дакумент, неабходны для яго сям’і. Замест натарыўса Міхаіл атрымаў 10 сутак змяшчэння ў штрафны ізалятар.

Міхаіл выйшаў на волю 6 траўня 2024 г. 

Прысуд у Гомелі: удзельнічаў у акцыях пратэсту, прымяніў гвалт да трох супрацоўнікаў АМАП

Суд Цэнтральнага раёна Гомеля 18 жніўня вынес прысуд Міхаілу Зубкову, якога абвінавацілі ў гвалце над супрацоўнікамі міліцыі (арт. 364 Крымінальнага кодэкса).