Міа Сяргееўна Міткевіч - менеджэрка ў сацыяльна-культурнай сферы з Мінску, арт-дырэктарка івэнт-агенцтва Nuestro Amor. У дзяўчыны дзве вышэйшыя адукацыі: яна скончыла БДУКМ і Маскоўскі дзяржаўны інстытут культуры і мастацтваў. Таксама ў яе свой бізнэс у сферы кінавытворчасці.

Міткевіч абвінавацілі ў распальванні сацыяльнай варожасці па прыкмеце прыналежнасці да пэўнай сацыяльнай групы па ч. 1 арт. 130 Крымінальнага кодэкса. Паводле матэрыялаў справы Міткевіч "з мэтай распачынання варожага стаўлення і падрыву даверу да міліцыі на сваёй старонцы ў «ВКонтакте» 26 верасня, 3 і 10 кастрычніка 2020 года размясціла выяўленыя ў непрыстойнай форме паведамленні. У іх яна заклікала да гвалтоўных дзеянняў у дачыненні да супрацоўнікаў АУС. Дадзеная інфармацыя была даступная для неабмежаванага кола карыстальнікаў сеткі інтэрнэт. Міі ставіўся ў віну матыў "палітычнай і ідэалагічнай варожасці, звязанай з электаральнай кампаніяй Беларусі і рознымі палітычнымі поглядамі". Віну Міа прызнала толькі ў частцы напісання пастоў. Намер і мэты – не.

20 траўня 2021 Мінскі гарадскі суд асудзіў яе да трох гадоў калоніі агульнага рэжыму. Адбывала пакаранне ў ПК-4. 

Выйшла на волю ў сярэдзіне кастрычніка 2023 г. 

За тры допісы "ВКонтакте" пра міліцыянтаў культурнай менеджэрцы пагражае да пяці гадоў калоніі

У Мінскім гарадскім судзе 14 траўня пачаўся разгляд крымінальнай справы па частцы 1 артыкула 130 Крымінальнага кодэкса (распальванне расавай, нацыянальнай, рэлігійнай альбо іншай сацыяльнай варожасці або розні) супраць 29-гадовай менеджэркі ў сацыяльна-культурнай сферы Міі Міткевіч. У дзяўчыны дзве вышэйшыя адукацыі: яна скончыла БДУКМ і Маскоўскі дзяржаўны інстытут культуры і мастацтваў. Таксама ў яе свой бізнэс у сферы кінавытворчасці. Цяпер за тры допісы "ВКонтакте" пра міліцыянтаў ёй пагражае да пяці гадоў пазбаўлення волі. Справу разглядае суддзя Алена Шылько, дзяржабвінавачанне падтрымлівае пракурор Аляксандр Рамановіч.

Культурную менеджэрку асудзілі на тры гады калоніі за допісы "ВКонтакте" пра міліцыянтаў

Мінскі гарадскі суд 20 траўня асудзіў да трох гадоў калоніі агульнага рэжыму па частцы 1 артыкула 130 Крымінальнага кодэкса 29-гадовую менеджэрку ў сацыяльна-культурнай сферы, арт-дырэктарку івэнт-агенцтва Nuestro Amor Мію Міткевіч. Суддзя Алена Шылько абвінаваціла дзяўчыну ў распальванні сацыяльнай варожасці ў дачыненні да міліцыянтаў трыма допісамі "ВКонтакте". Пра допісы дзяўчыны ў сацсетцы міліцыі стала вядома з закрытага тэлеграм-чата. У Міткевіч дзве вышэйшыя адукацыі ў сферы культуры, але ўжо пяць месяцаў яна знаходзіцца за кратамі. Дзяўчына прызнала факт напісання пастоў, але сцвярджае, што не хацела распальваць варожасць да міліцыянтаў, бо нават "не разумее, што ёсць прыкмета сацыяльнай прыналежнасці". Дзяржаўнае абвінавачанне падтрымліваў пракурор Аляксандр Рамановіч. "Вясна" назірала за судом і распавядае абставіны гэтай справы.