Максім Алегавіч Анкуда быў затрыманы ў межах крымінальнай справы аб групавых дзеяннях, якія груба парушаюць грамадскі парадак (арт. 342 Крымінальнага кодэксу).

Пазней Максіма абвінавацілі ў абразе прадстаўнікоў улады (арт. 369 Крымінальнага кодэкса) і абразе прэзідэнта (ч. 1 арт. 368) і змясцілі ў СІЗА-1.

Судом Ленінскага раёна Мінска 27 траўня 2022 г. Максім быў прызнаны вінаватым у здзяйсненні злачынстваў, прадугледжаных ч. 1 арт. 368 і арт. 369 Крымінальнага кодэкса, па сукупнасці якіх яму прызначана пакаранне ў выглядзе пазбаўлення волі на тэрмін 1 год 6 месяцаў, а таксама штраф у памеры 100 базавых велічынь (3 200 рублёў).

Па падліках праваабаронцаў, на сярэдзіну траўня 2023 г. палітвязень цалкам адбыў тэрмін і выйшаў на волю.

Паўтара года калоніі прысудзілі мінчаніну за абразу прэзідэнта і чыноўнікаў

Па матэрыялах абвінавачання, Максім Анкуда, з выкарыстаннем сацыяльных сетак і мабільнага тэлефона публічна абразіў некалькі дзяржаўных чыноўнікаў: прэзідэнта Рэспублікі Беларусь, Генеральнага пракурора, старшыню ЦВК, намесніка міністра ўнутраных спраў і іншых службовых асоб у сувязі з выкананнем імі службовых абавязкаў.