Леанід Леанідавіч Судаленка — старшыня Гомельскага аддзялення Праваабарончага цэнтра "Вясна", праваабаронца з 20-гадовым стажам аказання дапамогі ў аднаўленні парушаных правоў грамадзянаў. Ён дапамагаў у падрыхтоўцы і накіраванні шматлікіх індывідуальных зваротаў у Камітэт па правах чалавека ААН супраць Беларусі. 

На працягу 2020 года Леанід Судаленка аказваў юрыдычную дапамогу пры абскарджанні пастаноў, вынесеных судом за ўдзел у несанкцыянаваных мітынгах, якія адбываюцца ў Гомелі пасля выбараў прэзідэнта. 

Быў затрыманы раніцай 18 студзеня 2021 г. па дарозе на офіс у межах крымінальнай справы, распачатай па арт. 342 Крымінальнага кодэкса (групавыя дзеянні, якія груба парушаюць грамадскі парадак) і быў змешчаны ў ізалятар часовага ўтрымання. Яшчэ 5 студзеня ў грамадска-палітычным цэнтры на вуліцы Палескай, 52, дзе знаходзіцца ў тым ліку і офіс "Гомельскай Вясны", адбыўся ператрус, які доўжыўся больш за 9,5 гадзін. Увесь гэты час у офісе знаходзіўся Леанід Судаленка. Пасля ператрусу яго даставілі ў УБАЗ, затым адпусцілі. Таксама правялі ператрус у яго доме.

За сваю праваабарончую дзейнасць быў уганараваны прэстыжнай французскай прэміяй "Свабода-Роўнасць-Братэрства" ў 2019 годзе. У тым жа годзе беларускай праваабарончай супольнасцю ён быў узнагароджаны Нацыянальнай прэміяй за дасягненні ў галіне правоў чалавека ў намінацыі "Праваабаронца года".

3 верасня 2021 г. у судзе Цэнтральнага раёна г. Гомеля распачаўся працэс. Суддзя Сяргей Салоўскі вынес пастанову, якой вырашыў праводзіць суд у закрытым пасяджэнні на працягу ўсяго разбіральніцтва. 3 лістапада 2021 Леаніда асудзілі да трох гадоў пазбаўлення волі ў калоніі агульнага рэжыму. 

14 студзеня 2022 г. у судзе Гомельскага раёна ў закрытым рэжыме разгледзелі апеляцыйную скаргу. Суддзя Мікалай Маратаеў вырашыў, што прысуд вынесены справядліва, а довады абвінавачаных, выкладзеныя ў скарзе, задавальненню не падлягаюць.

Леанід Судаленка 27 студзеня 2022 г. быў этапаваны ў папраўчую калонію № 3.

У кастрычніку 2022 г. МУС унёс палітзняволенага праваабаронцу ў пералік "асобаў, датычных да экстрэмісцкай дзейнасці".

Вядома, што адміністрацыя калоніі цісне на палітзняволенага праваабаронцу: яго з верасня зрабілі "злосным парушальнікам правілаў унутранага распарадку калоніі", пазбавілі кароткатэрміновага спаткання і права на пакупкі ў краме.

Паводле інфармацыі праваабаронцаў, якую атрымалі ў снежні 2022-га, да Леаніда ўвесь час прыходзяць з праверкамі і часта выварочваюць ягоныя рэчы, аднак трымаецца ён добра, настроены бадзёра. Раней праваабаронца працаваў на лесапільні, але пазней быў пераведзены на разбор правадоў. Умовы на новай працы горшыя.

На працэсе над Алесем Бяляцкім, Уладзімірам Лабковічам і Валянцінам Стэфановічам стала вядома, што супрацоўнікі ГУБАЗіКа праслухоўвалі палітзняволенага Леаніда Судаленку на спатканні з жонкай у пакоі кароткатэрміновых спатканняў у гомельскім СІЗА № 3. Гэта адбылося праз два месяцы пасля затрымання праваабаронцы. Падчас спаткання Леанід цікавіўся ў жонкі, ці быў хтосьці затрыманы пасля масавых ператрусаў у прадстаўнікоў грамадскай супольнасці 16 лютага 2021 года, на што жонка адказала, што толькі Дзмітрыя Салаўёва і Андрэя Комліка-Ямаціна. Жонка распавяла мужу, што ёй тэлефанаваў Алесь Бяляцкі і прапаноўваў сваю дапамогу. Пракурор акцэнтаваў увагу на тым, што Леанід прасіў жонку збіраць чэкі на адваката, лекі, вітаміны, якія яна набывае яму.

У матэрыялах справы ўтрымлівалася шмат пратаколаў агляду гомельскага сайту "Вясны", а таксама профіль Леаніда Судаленкі на сайце prisoners.spring96.org — на пасяджэнні пракурор зачытаў яго. Таксама стала вядома, што следства назірала за публікацыямі на сайце "Вясны" пра затрыманне Леаніда Судаленкі і нават зафіксавала, калі гэтая навіна была галоўнай на сайце.

21 ліпеня 2023 г. праваабаронца выйшаў на волю з ПК № 3, цалкам адбыўшы тэрмін. Ён эміграваў. 

У снежні 2023 г. на зямельны ўчастак Леаніда наклалі арышт. Падставай для такіх дзеянняў стала адкрыццё 1 лістапада чарговай крымінальнай справы ў дачыненні да яго паводле арт. 361-4 КК (іншае садзейнічанне экстрэмісцкай дзейнасці). Таксама дома ў Судаленкі адбыўся ператрус.

У пачатку сакавіка 2024 г. стала вядома, што супраць Леаніда распачалі завочную крымінальную справу. Яму інкрымінаваны артыкул 361-4 КК (садзейнічанне экстрэмісцкай дзейнасці). 

"Звязваем гэта з яго дзейнасцю па абароне правоў чалавека". Заява "Вясны" ў сувязі з новай крымінальнай справай супраць Леаніда Судаленкі

У сувязі з інфармацыяй аб пачатку новага крымінальнага пераследу праваабаронцы і былога палітвязня Леаніда Судаленкі за "садзейнічанне экстрэмісцкай дзейнасці", мы, сябры Праваабарончага цэнтра "Вясны", заяўляем наступнае.

У ААН зарэгістравалі зварот экс-палітвязня Леаніда Судаленкі па "справе Вясны"

У Камітэце ААН па правах чалавека 12 кастрычніка 2023 года зарэгістравалі індывідуальны зварот праваабаронцы і былога палітвязня Леаніда Судаленкі па крымінальнай "справе Вясны". Нагадаем, у верасні 2021 года яго асудзілі да трох гадоў калоніі паводле ч.1 і 2 арт. 342 (арганізацыя і фінансаванне дзеянняў, якія груба парушаюць грамадскі парадак). Праваабаронца цалкам адбыў тэрмін і выйшаў на волю.

Мой статус быў "злосны парушальнік". Леанід Судаленка — пра зняволенне, ад’езд з Беларусі і салідарнасць

Праваабаронца ПЦ "Вясна" і былы палітзняволены Леанід Судаленка распавёў пасля ад’езду з Беларусі, чаму прыняў такое рашэнне, як выглядала дыскрымінацыя асуджаных па палітычных артыкулах у зняволенні і чаму салідарнасць важная. "Вясна" прыводзіць словы Леаніда ў якасці маналогу.

Праваабаронца Леанід Судаленка: "Дзеля дапамогі людзям ахвяраваў сваёй свабодай"

Адразу пасля вызвалення ён даў эксклюзіўнае інтэрв’ю "Народнай Волі" — "Вясна" перадрукоўвае яго.

На волю выйшаў праваабаронца Леанід Судаленка, цалкам адбыўшы тэрмін

За кратамі праваабаронцу ўтрымлівалі два з паловай гады.

"Ён сядзіць, справа яго жыве, а імя яго гучыць". Праваабаронцу "Вясны" Леаніду Судаленка споўнілася 56 гадоў

Сёння, 23 верасня, палітзняволенаму праваабаронцу "Вясны" з Гомеля Леаніду Судаленку спаўняецца 56 гадоў. Свой Дзень нараджэння ён сустракае ў папраўчай калоніі №3 у Віцебскай вобласці. З Віцебска родам і блізкі сябар Леаніда — Павел Левінаў, праваабаронца Беларускага Хельсінкскага камітэта. Адзін аднаго яны называюць "братамі", а аб'ядноўваюць іх не толькі праваабарончая дзейнасць, але і незвычайныя традыцыі. "Вясна" распавядае пра сяброўства двух праваабаронцаў.

"Правы нам дае не дзяржава". Вялікае інтэрв'ю з Леанідам Судаленкам за два тыдні да яго затрымання

За два тыдні да затрымання кіраўніка Гомельскага аддзялення "Вясны" Леаніда Судаленкі на сайце Беларускага дома правоў чалавека імя Барыса Звозскава выйшла вялікае інтэрв’ю з ім. Які шлях прайшоў Леанід ад сельскага хлопчыка да вядомага ў Беларусі і за яе межамі праваабаронцы? Што рухала яго ў дзейнасці па адстойванні інтарэсаў простых грамадзянаў? Колькі скаргаў ён накіраваў у Камітэт па правах чалавека ААН?

Урад Беларусі адказаў ААН па "справе Вясны": "Крымінальная пераслед не звязаны з іх працай па прасоўванні правоў чалавека"

На сайце Упраўлення Вярхоўнага камісара ААН з’явіўся афіцыйны адказ урада Беларусі на запыт чатырох Спецыяльных дакладчыкаў па факце вобшукаў і затрыманняў праваабаронцаў, прадстаўнікоў НДА і незалежных СМІ, здзейсненых у ліпені 2021 года.

Праваабаронца за кратамі: дармаеды, КПЧ ААН, агуркі і РЭП — знаёмімся з Леанідам Судаленкам у падкасце “Вясна прыйдзе”

Адвакат дармаедаў, станочнік па зваротах у КПЧ ААН, “вясновец”, прадстаўнік незалежнага прафсаюза, бацька чатырох сыноў (сярод якіх таксама ёсць Леанід Леанідавіч) і стваральнік маласольных агуркоў — чым яшчэ цікавы Леанід Леанідавіч?

Леанід Судаленка, Лілія Уласава, Максім Знак і Дзмітрый Лаеўскі атрымалі прэмію “За абарону правоў чалавека”

Прэмія “За абарону правоў чалавека-2021” Рады адвакатаў і юрыдычных супольнасцяў Еўропы (ССВЕ) прысуджаная беларускім юрыстам Леаніду Судаленку, Ліліі Уласавай, Максіму Знаку і Дзмітрыю Лаеўскаму, а таксама ўсім адвакатам у Афганістане, якія знаходзяцца ў небяспецы.

Жонка Леаніда Судаленкі пра сустрэчу ў СІЗА: "Нават калі яму давядзецца адседзець, ён усё адно сваё імя сумленнае абароніць"

Палітзняволены кіраўнік Гомельскага аддзялення "Вясны" Леанід Судаленка днямі сустрэўся з жонкай у СІЗА. Спатканне, якое ім далі, аказалася для сямейнай пары поўнай нечаканасцю.

Міжнародная салідарнасць з Леанідам Судаленкам

Леанід Судаленка - праваабаронца з 20-гадовым стажам аказання дапамогі ў аднаўленні парушаных правоў грамадзян. Ён дапамагаў у падрыхтоўцы і накіраванні шматлікіх індывідуальных зваротаў у Камітэт па правах чалавека ААН супраць Беларусі. Пра яго праваабарончую дзейнасць вядома не толькі на тэрыторыі Беларусі, але і за ейнымі межамі.

Падатковая патрабуе ад Леаніда Судаленкі здаць дэкларацыю аб даходах за 6 гадоў

У падатковай кажуць, што ім прыйшла "пэўная інфармацыя" пра суму грошай. Таму інспекцыя дае праваабаронцу 10 дзён, каб пацвердзіць яе. У лісце з турмы праваабаронца піша, што, мабыць, на яго паступіла нейкая замова. Магчыма, цікавасць падатковай звязаная са "справай "Вясны“.

У Стакгольме прайшла фотаакцыя ў падтрымку палітзняволеных сябраў “Вясны”

17 лістапада праваабаронцы з “Ostgruppen — Шведскай ініцыятывы за дэмакратыю і правы чалавека” сфатаграфаваліся з банерам і фотаплакатамі палітзняволеных “вясноўцаў” у знак салідарнасці і іх падтрымкі. 

Супольная заява ў сувязі з прысудам дваім сябрам беларускага праваабарончага цэнтра "Вясна"

Праваабарончыя арганізацыі заклікаюць улады Беларусі спыніць крымінальны пераслед паводле палітычных матываў.

Вынесены прысуд "вясноўцам" Леаніду Судаленку і Таццяне Ласіцы: тры і два з паловай гады калоніі

У судзе Цэнтральнага раёна г. Гомеля 3 лістапада агучылі прысуд па крымінальнай справе ў дачыненні да праваабаронцы “Вясны” Леаніда Судаленкі і валанцёркі арганізацыі Таццяны Ласіцы.

Тры і два з паловай гады калоніі: гомельскім праваабаронцу і валанцёркам запрасілі пакаранне

Стала вядома, што пракуроры Яўген Фартушняк і Кірыл Вышнякоў запатрабавалі пакаранне палітвязням: для Леаніда Судаленкі і Таццяны Ласіцы — тры гады пазбаўлення волі, Марыі Тарасенка — два з паловай гады калоніі.

Суд над Леанідам Судаленкам, Таццянай Ласіцай і Марыяй Тарасенка праходзіць у закрытым рэжыме

У судзе Цэнтральнага раёна г. Гомеля 3 верасня распачаўся суд над праваабаронцам “Вясны” Леанідам Судаленкам і валанцёркамі арганізацыі Таццянай Ласіцай і Марыяй Тарасенка.

Суд над гомельскімі праваабаронцам і валанцёркамі: Што вядома пра справу і суддзю?

"Вясна" распавядае, за што будуць судзіць праваабаронцу і валанцёрак, чаму гэтая крымінальная справа з'яўляецца палітычна матываванай і што вядома пра суддзю Салоўскага.

Тэрмін утрымання пад вартай праваабаронцу Леаніду Судаленку працягнулі яшчэ на два месяцы

18 траўня павінен быў скончыцца тэрмін утрымання пад вартай праваабаронцы і палітвязня Леаніда Судаленкі. Сёння стала вядома, што гэты тэрмін працягнуты ізноў, на гэты раз да 18 ліпеня.

Абсерваторыя па абароне праваабаронцаў асудзіла адвольнае затрыманне сябраў “Вясны” Леаніда Судаленкі і Марыі Тарасенка

Абсерваторыя па абароне праваабаронцаў, партнёрская праграма Міжнароднай федэрацыі за правы чалавека (FIDH) і Сусветнай арганізацыі супраць катаванняў (OMCT), выступіла з заявай, у якой асудзіла адвольнае затрыманне юрыста гомельскага аддзялення ПЦ “Вясна” Леаніда Судаленкі, а таксама яго памочніцы і валанцёркі арганізацыі Марыі Тарасенка.

Узімку праваабаронца Судаленка дапамог з дровамі шматдзетнай вясковай сям’і. Следcтва назвала гэта «арганізацыяй пратэстаў»

Прыяцелька палітзняволенага праваабаронцы Леаніда Судаленкі атрымала ад яго ліст. Ён піша, што яму прад’явілі канчатковае абвінавачанне, і расказвае пра сваю «віну», перадае "Радыё Свабода".