Кім Андрэевіч Самусенка — актывіст, сябра рады грамадскага руху “Дзея”. На волі Кіма чакае жонка Алеся і маленькая дачка Лада, якая апошні раз бачыла бацьку, калі ёй было толькі шэсць месяцаў.

Кіма затрымалі 3 лістапада 2020 г. пасля вобшукаў у яго дома і доме ягонай маці. Следчы камітэт заявіў, што ён і яго знаёмы датычныя да ўзлома камп'ютарнай сістэмы Мінгарвыканкама. Акрамя гэтага, Следчы камітэт заявіў, што Кім Самусенка «з'яўляўся актыўным ўдзельнікам несанкцыянаваных масавых мерапрыемстваў на тэрыторыі сталіцы з 9 жніўня гэтага года».

Кіму прад'явілі абвінавачванні па ч. 1 арт. 342 Крымінальнага кодэкса (дзеянні, якія груба парушаюць грамадскі парадак) і па ч. 2 арт. 349 КК (доступ да кампутарнай інфармацыі, учынены групай асоб па папярэдняй змове). Утрымліваўся ў СІЗА-1 Мінска. 

24 лістапада 2021 распачаўся закрыты працэс над Кімам, на якім былі агучаныя ўжо шэсць інкрымінаваных артыкулаў КК: ч. 1 арт. 350 (мадыфікацыя камп'ютарнай інфармацыі), арт. 352 (неправамернае завалоданне камп'ютарнай інфармацыяй), ч. 1 арт. 354 (выкарыстанне шкоднасных камп'ютарных праграм), ч. 1 арт. 342 (актыўны ўдзел у групавых дзеяннях, якія груба парушаюць грамадскі парадак), арт. 341 (псаванне маёмасці ў грамадскіх месцах), ч.1 арт. 13, ч. 2 арт. 293 (падрыхтоўка да ўдзелу ў масавых беспарадках). Суддзя Жанна Хвайніцкая пастанавіла разглядаць справу ў закрытым рэжыме, бо "ў матэрыялах крымінальнай справы ўтрымліваюцца звесткі, якія складаюць дзяржаўную таямніцу".

У судзе Заводскага раёна Мінска 28 студзеня 2022 г. агучылі прысуды чатыром палітвязням па "справе ўзлому камп'ютарнай сістэмы Мінгарвыканкама". Братоў Кіма і Аляксея Самусенкаў асудзілі да 6,5 і 4 гадоў калоніі агульнага рэжыму адпаведна, Паўла Дразда і Івана Андрушойця — да 3,5 гадоў калоніі кожнага.

У сярэдзіне лютага 2022 г. Кіма перавялі з СІЗА-1 у Турму №4.

26 красавіка 2022 г. Мінгарсуд пакінуў апеляцыйную скаргу на прысуд без зменаў. У канцы траўня 2022 г. стала вядома, што Кім быў этапаваны ў магілёўскую ПК № 15.

Напрыканцы кастрычніка МУС уключыў палітвязня ў спіс "экстрэмістаў".

"Другі раз за год мы з дачкой экстранна пакінулі дом", — жонка палітвязня Кіма Самусенкі

Жонка палітвязня Кіма Самусенкі распавяла "Вясне" пра мужа, пра тое, што ёй дапамагае спраўляцца з цяжкасцямі і як дапамагчы палітзняволенаму актывісту руху "Дзея".

Ад 3,5 да 6,5 гадоў калоніі — прысуды чатыром палітвязням па "справе ўзлому камп'ютарнай сістэмы Мінгарвыканкама"

Згодна з матэрыяламі крымінальнай справы, абвінавачаныя з дапамогай шкоднаснага ПЗ атрымалі доступ да камп'ютарных сістэм КУП "ЦІТ Мінгарвыканкама" і ГУУС Мінгарвыканкама, што пацягнула за сабой парушэнне нармальнай працы прадпрыемстваў і дзяржорганаў, а таксама гэтыя асобы скапіявалі і выдалілі файлы розных фарматаў і ўнеслі ў іх загадзя ілжывую інфармацыю.

Суд па "справе ўзлому камп'ютарнай сістэмы Мінгарвыканкама" зрабілі закрытым

У судзе Заводскага раёна Мінска 24 лістапада 2021 пачалося судовае разбіральніцтва па "справе ўзлому камп'ютарнай сістэмы Мінгарвыканкама".

На заснавальніка “Дзеі” ўзбудзілі дзве крымінальныя справы. Адна з іх — за ўзлом сістэмы Мінгарвыканкама

Затрыманага 3 лістапада заснавальніка і сябра рады грамадскага руху “Дзея” Кіма Самусенку падазраюць ва ўзломе кампутарнай сістэмы Мінгарвыканкама (ч. 2 арт. 349 КК) і дзеяннях, якія груба парушаюць грамадскі парадак, у Мінску з 9 жніўня (ч. 1 арт. 342 КК). Праз два дні быў затрыманы і брат Кіма — Аляксей Самусенка. «Вясна» распавядае, што вядома па гэтай справе на дадзены момант.