Юрый Юр'евіч Ганцарэвіч — журналіст “Intex-press” з Баранавічаў. Быў затрыманы 27 красавіка 2022 года, 29 красавіка яго асудзілі на 10 сутак арышту. 

Прыкладна праз тыдзень пасля затрымання журналіста ў праўладных тэлеграм-каналах з'явіўся фрагмент відэа з яго допыту і інфармацыя аб прычыне затрымання Ганцарэвіча: ён нібыта фатаграфаваў расійскую ваенную тэхніку і адпраўляў здымкі ў СМІ, прызнаныя беларускімі ўладамі экстрэмісцкімі.

6 траўня Ганцарэвічу было прад'яўлена абвінавачанне паводле ч. 1 арт. 361-4 Крымінальнага кодэкса Беларусі (Садзейнічанне экстрэмісцкай дзейнасці). Пасля выстаўлення абвінавачання Юрыя Ганцарэвіча перавялі з ІЧУ ў СІЗА. У канцы чэрвеня 2022 ягоную справу перадалі ў Брэсцкі абласны суд.

Брэсцкі абласны суд 13 ліпеня 2022 пачаў разглядаць крымінальную справу палітзняволенага журналіста. 14 ліпеня судовая калегія пад старшынствам Мікалая Грыгаровіча прызнала Юрыя вінаватым і прызначыла яму 2 гады і 6 месяцаў зняволення ў калоніі агульнага рэжыму. 20 верасня 2022 г. Вярхоўны суд пакінуў прысуд без зменаў.

На пачатку жніўня стала вядома аб пераводзе Юрыя з СІЗА-6 у брэсцкі СІЗА-7. 1 кастрычніка 2022 г. ён быў этапаваны ў ПК № 3.

Выйшаў на волю напрыканцы лета 2024 г. 

За фотавыявы вайсковай авіятэхнікі ў Брэсце асуджаны журналіст Юрый Ганцарэвіч

Паводле матэрыялаў абвінавачвання, журналіст адправіў "Радыё Свабода", прызнанаму экстрэмісцкім фармаваннем, "фотавыявы вайсковай авіятэхнікі, якая знаходзіцца на тэрыторыі аэрадрома 61 знішчальнай авіяцыйнай базы, якая дыслакуецца ў Баранавічах, з подпісам "аэрадром у Баранавічах".