Яўген Аляксандравіч Харашкевіч — жыхар Наваполацку, абвінавачаны адразу па трох артыкулах Крымінальнага кодэксу:

• ч. 1 арт. 130 КК — Распальванне сацыяльнай варожасці;
• арт. 369 КК — Абраза прадстаўніка ўлады;
• ч. 1 арт. 342 КК — Падрыхтоўка і арганізацыя групавых дзеянняў, якія груба парушаюць грамадскі парадак.

Па сукупнасці пакаранняў Яўгена Харашкевіча асудзілі на 4 гады пазбаўлення волі з адбываннем пакарання ў калоніі агульнага рэжыму. Пакуль Яўген сядзеў у СІЗА, у яго нарадзілася дачка Мілана. На абвяшчэнне прысуду бацькі Яўгена прынеслі ў залу раздрукаваныя каляровыя фотаздымкі Міланы.

У сярэдзіне снежня 2021 стала вядома, што Яўген быў этапаваны з СІЗА-2 у шклоўскую ПК № 17.

Паводле інфармацыі праваабаронцаў, адміністрацыя калоніі № 17 цісне на палітвязня: яго двойчы за месяц змяшчалі ў штрафны ізалятар на 10 сутак, а таксама пазбавілі кароткатэрміновага спаткання. Па стане на травень 2022 г. Яўгена пазбавілі працяглага спаткання і скарацілі норму атаваркі з пяці да дзвюх базавых велічыняў. Акрамя гэтага, Яўгену перадаюць лісты толькі ад сваякоў.

Паводле інфармацыі праваабаронцаў, за тыдзень да Дня народзінаў Яўгена змясцілі ў штрафны ізалятар на трое сутак. Прычынай стаў дасланы жонкай ліст з віншаваннямі ад неабыякавых людзей перад Днём народзінаў палітвязня. Цэнзар разглядзеў у гэтым "палітычны падтэкст", таму ліст быў знішчаны, а Яўгена адправілі ў ШІЗА.

Вядома, што ў жніўні 2022 г. Яўгену змянілі рэжым адбывання пакарання на турэмны, палітвязня да канца тэрміна перавялі з калоніі № 17 у гродзенскую Турму № 1.

17 жніўня 2024 вызвалены цалкам адбыўшы тэрмін пакарання, прызначаны судом.

Жонка палітвязня Яўгена Харашкевіча: «Я ў дачкі зараз адна»

Зараз 27-гадовы хлопец адбывае турэмны тэрмін у шклоўскай калоніі, а за гэты час на волі ў яго паспела нарадзіцца дачка Мілана. Пра справу палітвязня, ціск на яго ў калоніі і пра тое, наколькі цяжка адной расціць дзіця, калі муж за кратамі, мы размаўляем з жонкай зняволенага Нінай Харашкевіч.

Навапалачаніна Яўгена Харашкевіча асудзілі на 4 гады калоніі. Суд над ім быў закрытым

Віцебскі абласны суд 16 верасня вынес рашэнне ў крымінальнай справе 27-гадовага жыхара Наваполацку Яўгена Харашкевіча. Мужчыну абвінавачвалі адразу па трох артыкулах крымінальнага кодэксу, у тым ліку ў падрыхтоўцы дзеянняў, якія груба парушаюць грамадскі парадак. Рашэнне агучыў суддзя Андрэй Прэйс. Бок абвінавачання прадстаўляў пракурор Аляксандр Філімонаў. Суд над Харашкевічам праходзіў у закрытым рэжыме.