Ян Андрэевіч Сцяцэнка са Жлобіна, да суда працаваў і жыў у Гомелі. Да верасня 2020 года працаваў на БМЗ. 2 жніўня 2021 года ў судзе Жлобіна і Жлобінскага раёну быў асуджаны на два гады пазбаўлення волі ў калоніі агульнага рэжыму па артыкуле 342 Крымінальнага кодэксу (Групавыя дзеянні, груба парушаючыя грамадскі парадак).

Яго, а таксама Андрэя Пархамовіча асудзілі па падзеях за 9 жніўня 2020 года, за якія ў Жлобіне ўжо судзілі людзей: падставай для следства сталі апублікаваныя фота і відэа з акцыі. Згодна з абвінавачаннем, яны прынялі ўдзел у масавых мерапрыемствах, якія былі спалучаныя з відавочным непадпарадкаваннем прадстаўнікам улады, перашкаджалі руху транспарту.

Па падліках праваабаронцаў, летам 2023 г. палітвязень выйшаў на волю з ПК № 1, цалкам адбыўшы тэрмін.

Жлобінцам працягваюць выносіць прысуды па падзеях 9 жніўня

Другога жніўня ў судзе Жлобіна і Жлобінскага раёну вынесеныя прысуды 22-гадоваму Яну Сцяцэнку і 27-гадоваму Андрэю Пархамовічу. Іх прызналі вінаватымі паводле ч.1 арт.342 Крымінальнага кодэкса. Суддзя Ерафееў вынес наступныя пакаранні: прызначыў Яну Сцяцэнку два гады пазбаўлення волі ў калоніі агульнага рэжыму, а Андрэю Пархамовічу – два гады абмежавання волі без накіравання ў ПУАТ – "хатняй хіміі". Менавіта такое пакаранне запрасіў пракурор Панчанка.