Іван Уладзіміравіч Дацышын — 21-гадовы студэнт чацвёртага курса факультэта радыёфізікі і камп'ютарных тэхналогій БДУ.

У ноч з 11 на 12 жніўня 2020 ён знаходзіўся ў Мінску на праспекце Дзяржынскага каля парка Паўлава. Яны з сябрамі ўбачылі, што каля скульптуры зубра стаяць людзі, і вырашылі падыйсці да іх. Але яны не паспелі гэтага зрабіць: да прыпынку пад'ехаў аўтобус, адкуль пачалі выбягаць супрацоўнікі органаў унутраных спраў, людзі пачалі разбягацца.

Калі аўтобус з людзьмі пачаў рухацца, ён узяў камень і кінуў у бок транспарту. Ён не бачыў, ці трапіў куды-небудзь праз дрэнны зрок. Але Іван падкрэслівае, што ён кінуў толькі адзін камень, бо хацеў, каб міліцыя сыйшла і не затрымлівала людзей.

9 сакавіка 2021 года ў судзе Маскоўскага раёна пачаўся разгляд справы Івана. На судзе выступілі два міліцыянты, прызнаныя па справе пацярпелымі. Яны сказалі, што не маюць прэтэнзій да абвінавачанага, выбачэнні яго прымаюць.

18 сакавіка 2021 быў вынесены прысуд: чатыры гады пазбаўлення волі ў калоніі ўзмоцненага рэжыму. Менавіта такое пакаранне прасіў пракурор.

Пачаўся суд над Іванам Дацышыным: студэнт прызнаў віну, але супрацоўнікі ўпэўненыя, што пацярпелі не ад яго

У судзе Маскоўскага раёна Мінска пачаўся разгляд крымінальнай справы ў адносінах да Івана Дацышына. 21-гадовы хлопец — студэнт чацвёртага курса факультэта радыёфізікі і камп'ютарных тэхналогій БДУ. Яго абвінавацілі паводле ч.2 арт. 293 Крымінальнага кодэксу. Справу разглядае суддзя Таццяна Пірожнікава, дзяржаўнае абвінавачанне падтрымлівае пракурор Валеры Гадуноў.

Студэнту БДУ — чатыры гады "калоніі" узмоцненага рэжыму

У судзе Маскоўскага раёна Мінска вынесены прысуд палітвязню Івану Дацышыну. Яго прызналі вінаватым паводле ч.2 арт. 293 Крымінальнага кодэксу і асудзілі да чатырох гадоў пазбаўлення волі ў калоніі ўзмоцненага рэжыму: менавіта такое пакаранне прасіў пракурор.