Іван Леанідавіч Цагалка — майстар будаўніча-мантажных работ з Мінску.

Яму было прад'яўленае абвінавачванне па арт. 364 Крымінальнага кодэкса (Гвалт у дачыненні да міліцыі) і па арт. 342 КК (Актыўны ўдзел у групавых дзеяннях, якія груба парушаюць грамадскі парадак). Крымінальная справа тычылася падзей 13 верасня 2020 года, калі ў Мінску праходзіла акцыя пратэсту "Марш герояў" і частка пратэстоўцаў дайшла да Драздоў, дзе адбыліся затрыманні. Згодна з абвінавачваннем, Цагалка "ўдарыў адзін раз нагой па службовым аўтамабілі і тым самым пашкодзіў капот. Затым ён нанёс па два ўдары супрацоўнікам АМАП Папову і Назараву, якія не пацягнулі разладу іх здароўя". Іван прызнаў віну толькі ў тым, што неспадзявана ўдарыў па аўтамабілі. Па ўсіх астатніх эпізодах не прызнаў.

15 красавіка 2021 года суддзя суда Савецкага раёна Мінска Сяргей Шаціла абвясціў прысуд па справе Івана Цагалкі. Яго прызналі вінаватым і прысудзілі да трох гадоў пазбаўлення волі з адбываннем у калоніі агульнага рэжыму.

У чэрвені 2023 г. стала вядома, што палітвязень выйшаў на волю з ПК № 15, цалкам адбыўшы тэрмін.

Тры гады калоніі атрымаў Іван Цагалка, які ўдарыў міліцэйскае аўто на акцыі пратэсту ў Драздах

У судзе Савецкага раёна Мінска была разгледжаная крымінальная справа, узбуджаная супраць майстра будаўніча-мантажных работ Івана Цагалкі. Яму было прад'яўленае абвінавачванне па артыкуле 364 Крымінальнага кодэкса (Гвалт у дачыненні да міліцыі) і па 342 КК (Актыўны ўдзел у групавых дзеяннях, якія груба парушаюць грамадскі парадак). Крымінальная справа тычылася падзей 13 верасня 2020 года, калі ў Мінску праходзіла акцыя пратэсту "Марш герояў" і частка пратэстоўцаў дайшла да Драздоў, дзе адбыліся затрыманні. Пасля акцыі была ўзбуджаная крымінальная справа, адным з фігурантаў якога і стаў Цагалка.