Ірына Анатольеўна Прыгава была з Брэста была затрымана 10 сакавіка 2022 года па крымінальнай справе па двух артыкулах: ч. 1 арт. 339 КК (Хуліганства) і арт. 341 КК (Псаванне маёмасці). Ёй паставілі ў віну раскідванне бчб-сцяжкоў. Жанчыну змясцілі ў СІЗА-7.

22 ліпеня 2022 г. Следчы камітэт выставіў Ірыне таксама абвінавачванне паводле ч. 1 і ч. 2 арт. 368 (Абраза прэзідэнта) — нібыта за зняважлівыя надпісы на фасадах будынкаў, і перадаў справу ў суд.

Судовы разгляд пачаўся 11 жніўня 2022 г. у судзе Маскоўскага раёна Брэста. Падчас спрэчак 12 жніўня пракурор Ягор Кронда запатрабаваў Ірыне сумарна па ўсіх артыкулах 1 год 6 месяцаў калоніі ва ўмовах агульнага рэжыму. Суддзя Таццяна Лаўранюк 16 жніўня вынесла менавіта такі прысуд.

На пачатку кастрычніка 2022 г. Ірыну перавялі з СІЗА-7 у баранавіцкі СІЗА-6. Таксама праваабаронцам стала вядома, што за чатыры месяцы ад Ірыны Прыгавай не прыйшло ніводнага ліста, а карэспандэнцыя, якая дасылаецца ёй, вяртаецца адрасатам назад.

У канцы кастрычніка Ірыну этапавалі ў гомельскую жаночую калонію № 4.

МУС у лістападзе 2022 г. дадала палітзняволеную ў спіс "асобаў, датычных да экстрэмісцкай дзейнасці".

У апошніх днях траўня 2023 г. Ірына выйшла на волю, цалкам адбыўшы тэрмін.

Палітзняволеную Ірыну Прыгаву асудзілі на 1,5 года калоніі за пратэсныя і антываенныя надпісы, бел-чырвона-белыя і жоўта-блакітныя стужкі

Некалькі прадстаўнікоў пацярпелых па гэтай справе бакоў растлумачылі суду, як менавіта яны падлічвалі шкоду ад напісаных крэйдай і алоўкам надпісаў. Так, напрыклад, наконт надпісу крэйдай "Нет войне!" на будынку жыллёва-будаўнічага спажывецкага кааператыву "Ідэал плюс" старшыня ЖБСК адзначыў, што, пасля таго як надпіс атрымалася змыць, на сцяне засталіся драпіны. Іх зафарбавалі падчас раней запланаванай афарбоўкі цокаля, на што сышло 1/3 бляшанкі фарбы. Пры гэтым старшыня кааператыва падкрэсліў, што фарбаваць цокаль давялося б і без надпісу.