Ілля Уладзіміравіч Міронаў — валанцёр з Гомеля, вядомы ў горадзе арганізатар рок-канцэртаў. 

Быў затрыманы ў Гомелі па крымінальнай справе, распачатай за каментары ў інтэрнэце пасля гібелі супрацоўніка КДБ Дзмітрыя Федасюка і it-спецыяліста Андрэя Зельцэра. Спачатку Іллю абвінавачвалі паводле арт. 130 КК (распальванне варажнечы), але падчас следства абвінавачанне замянілі на арт. 369-1 КК (дыскрэдытацыя Рэспублікі Беларусь).

Ініцыятыва Іллі Міронава "Пішыце лісты" была ў ліку прэтэндэнтаў на перамогу ў Нацыянальнай прэміі за дасягненні ў галіне правоў чалавека ў намінацыі "Кампанія/ініцыятыва года-2021".

Нават за кратамі Ілля працягваў падтрымліваць беларусаў лістамі салідарнасці, але зусім не атрымлівае адказаў.

24 кастрычніка 2022 г. у судзе Савецкага раёна Гомеля адбыўся разгляд ягонай справы. Іллю прызналі вінаватым і прызначылі яму паўтара года зняволення, а таксама 200 базавых велічыняў штрафу. Праз тое, што валанцёр больш за год утрымліваўся за кратамі, яго пастанавілі вызваліць у зале суда.

У лістападзе 2022 г. Іллю затрымлівалі на пяць сутак за падпіску на суполку ў "ВКонтакте", прызнаную ўладамі экстрэмісцкай.

На пачатку снежня ён атрымаў па пошце ліст з суду. Мяркуючы па ўсім, пракурорка Ірына Курбацкая лічыць прысуд мяккім і патрабуе перагляду справы.

8 снежня Ілля пайшоў у РАУС на прафілактычную гутарку і быў ізноў затрыманы на 12 сутак. Быў вызвалены 20 снежня 2022 г.

10 лютага 2023 г. МУС дадала былога палітзняволенага ў "спіс экстрэмістаў".

У сакавіку 2023 г. Іллю затрымалі на 13 сутак. У яго дома адбыўся шосты з 2020 года ператрус. Неўзабаве пасля вызвалення актывіста ізноў затрымалі на 15 сутак паводле арт. 19.11 КаАП (распаўсюд экстрэмісцкіх матэрыялаў).

11 траўня 2023 г. Ілля быў зноў затрыманы, і 12 траўня 2023 г. яму прысудзілі 10 сутак адміністрацыйнага арышту паводле ч. 2 арт. 19.11 КаАП, пасля чаго ён быў вымушаны з'ехаць з краіны.

У лістападзе 2023 г. стала вядома, што на Іллю Міронава завялі чарговую крымінальную справу. Пра гэта на сваёй Facebook-старонцы распавяла яго маці, Валянціна Міронава. Яе выклікаюць у Следчы камітэт у якасці сведкі.

Facebook-старонка Іллі Міронава прызнаная "экстрэмісцкай". Адпаведнае рашэнне прынятае судом Кастрычніцкага раёна Віцебска 20 лістапада 2023 г.

Ілля Міронаў: Мяне затрымалі за тое, што я пішу скаргі

Валанцёр Ілля Міронаў выйшаў на волю і распавёў “Штодню” пра дэталі свайго арышту. Яго пакаралі 13 суткамі за нібыта падпіскі на экстрэмісцкія рэсурсы. Паводле назіранняў Іллі, колькасць затрыманых паводле палітычных матываў не змяншаецца.

Валанцёр пасля года за кратамі па "справе Зельцэра": "Мне прысніўся нейкі кашмар, я расплюшчыў вочы і зноў 2021 год"

"Яны пісалі і не верылі, што мяне затрымалі. І з кожным днём лістоў і людзей, якія пішуць, станавілася ўсё болей. Пачыналася з аднаго-двух, а праз месяц было больш за дзесяць. Мае суседзі ў камеры здзіўляліся, што так многа лістоў. Я сам быў здзіўлены, што людзі дасылалі такія шчырыя, душэўныя лісты, з паштоўкамі, стыкерамі, хтосьці фота дасылаў, усе хваляваліся, перажывалі".

Гомельскага валанцёра Іллю Міронава асудзілі да 1,5 года калоніі і вызвалілі ў зале суда

"Я дома, вызвалілі з залы суда! Вялікая падзяка, шчыры дзякуй за падтрымку і дапамогу! 1,5 года лагера + 200 базавых. Ваш Ілля М. Моцна абдымаю, люблю".

У валанцёра-палітвязня Іллі Міронава рэзка пагоршылася здароўе

Маці Іллі Міронава атрымала лісты ад сына, з якіх вынікае, што ў СІЗА яму цяжка псіхалагічна і з'явілася шмат праблем са здароўем. Ён піша, што яму колюць уколы і што ён мае "вялікія праблемы з вачыма".