Ігар Алегавіч Кісляк — адзін з пяці былых сілавікоў, якога затрымалі пасля таго, як у 2020-м годзе яны запісалі зварот супраць гвалту.

Падпалкоўнік міліцыі, былы намеснік начальніка аддзела ГУБАЗ МУС Рэспублікі Беларусь, які доўгі час праслужыў начальнікам крымінальнай міліцыі Жодзінскага ГАУС. У 2012 годзе ён звольніўся, а ў 2014 годзе стаў прадпрымальнікам.

12 жніўня 2020 года былыя сілавікі з Жодзіна Дзмітрый Удовін, Андрэй Дарошка, Вячаслаў Ільіч, Ігар Кісляк і Віталь Папроцкі запісалі моцны зварот да сілавікоў — яны асудзілі гвалт у дачыненні да беларусаў і папрасілі сваіх калег не быць карнікамі. Пазней мужчын затрымалі, а 13 студзеня 2025 году іх справу пачалі разглядаць у Мінскім абласным судзе.

Усіх былых сілавікоў судзяць паводле двух артыкулаў — «нанясенне шкоды нацыянальнай бяспецы Беларусі» (ч. 3 арт. 361 КК) і «распальванне варожасці» (ч. 3 арт. 130 КК). Ім пагражае да 12 гадоў калоніі. Судовы працэс узначальваў суддзя Сяргей Васілеўскі. 15, 16, 28 студзеня 2025 г. разгляд працягнуўся, 3 лютага 2024 г. быў агучаны прысуд (вядома толькі, што звязаны з пазбаўленнем волі ў калоніі).

Утрымліваўся ў турме № 8, пераведзены ў СІЗА №1.

11 красавіка 2025 года быў унесены ў пералік грамадзян Беларусі, замежных грамадзян і асоб без грамадзянства, якія маюць дачыненне да экстрэмісцкай дзейнасці.