Генадзь Міхайлавіч Смірноў быў асуджаны судом Ляхавіцкага раёна да 2 гадоў і 6 месяцаў пазбаўлення волі ў калоніі ўзмоцненага рэжыму па двух артыкулах Крымінальнага кодэксу: Абраза прэзідэнта (арт. 368 КК) і супраціў супрацоўніку органаў унутраных спраў (арт. 363 КК).

Паводле абвінавачвання, Генадзь Смірноў набыў улёткі дэструктыўнага характару, пасля чаго 15 сакавіка 2021 года разам з сынам Вячаславам Смірновым размясціў улёткі з партрэтам Лукашэнкі на дошцы аб'яваў аўтобуснага прыпынку, на трансфарматарнай падстанцыі каля Ляхавіцкага райвыканкама і на металічнай апоры вулічнага асвятлення каля дома па вул. Гагарына, 9. На ўлётках змяшчаўся тэкст "Адольф Григорьевич Лукашенко" і "Нам нужен труп в одежде короля, а не живой придурок у руля".

А ўвечары 3 жніўня падчас яго затрымання за здзяйсненне адміністрацыйных правапарушэнняў паводле ч. 1 арт. 19.3 і ч. 1 арт. 24.23 КаАП для дастаўлення ў РАУС аказаў супраціў, спалучаны з ужываннем гвалту, супрацоўніку міліцыі Аляксандру Болтуцю.

На пачатку снежня 2021 Генадзь напісаў у лісце, што аб'яўляе ў СІЗА сухую галадоўку. Там яго змяшчалі на 17 сутак у ШІЗА.

У сярэдзіне студзеня 2022 стала вядома, што Генадзь быў пераведзены з СІЗА-6 у шклоўскую ПК № 17. У верасні адміністрацыя калоніі змяшчала палітвязня ў ШІЗА. У снежні палітвязня змясцілі ў ПКТ на 3 месяца як злоснага парушальніка вызначанага парадку. Паводле крыніцы брэсцкіх праваабаронцаў, "Генадзь моцна схуднеў, высах, адны жылы тырчаць".

Вядома, што напрыканцы верасня 2023 г. Генадзь быў пакараны 17-цю суткамі ШІЗА. 

9 снежня 2023 г. выйшаў на волю. 

15 лютага 2024 г. у Ляхавічах адбыўся новы суд над Генадзем па арт. 25.11 КоАП (невыкананне патрабаванняў прэвентыўнага нагляду або прафілактычнага назірання). Суддзя Таццяна Жарко, яна прызначыла Генадзю 60 гадзін грамадскіх работ.

Пасля апошняга арышту ў Генадзя заставалася адно парушэнне, пасля якога б яго зноў адправілі ў калонію за парушэнне "прэвентыўнага нагляду". Таму ён разам з сынам Вячаславам прынялі рашэнне з'язджаць з краіны. Бацьку і сыну прыйшлося пакінуць дом, сабаку і катоў.

"Ставілі на расцяжку і білі па нагах". Былы палітвязень распавёў пра калонію № 17 і пераслед пасля вызвалення

Генадзь распавёў "Вясне" пра катаванні холадам і збіццё ў шклоўскай калоніі, пра пераслед пасля вызвалення і пра тое, як праходзіць адпрацоўка грамадскіх работ у Беларусі.

У Ляхавічах да калоніі і "хіміі" асудзілі бацьку і сына за расклейванне ўлётак з абразай Лукашэнкі

У судзе Ляхавіцкага раёна 27 кастрычніка вынеслі прысуд Генадзю і Вячаславу Смірновым, якіх вінавацілі ў абразе Лукашэнкі (ч. 1 арт. 368 Крымінальнага кодэкса), а Генадзя — яшчэ і ў супраціве супрацоўніку органаў унутраных спраў (ч. 2 арт. 363 Крымінальнага кодекса).