Эма Антонаўна Сцепулёнак была затрыманая ў Мёрах па крымінальнай справе, распачатай за каментары ў інтэрнэце пасля гібелі супрацоўніка КДБ Дзмітрыя Федасюка і it-спецыяліста Андрэя Зельцэра. 

Першапачаткова Эма Антонаўна праходзіла па крымінальнай справе паводле арт. 369 КК (Абраза прадстаўніка ўлады) і арт. 130 КК (Распальванне сацыяльнай варожасці). Пазней апошні артыкул знялі, але дадалі арт. 368 (Абраза Лукашэнкі). З 11 снежня 2021 г. знаходзілася ў СІЗА-2 (раней утрымлівалася ў СТ № 8).

У верасні 2022 г. палітзняволенай змянілі меру стрымання: жанчыну перавялі пад хатні арышт.

10 лістапада 2022 г. у судзе Мёрскага раёна ў закрытым рэжыме распачаўся разгляд справы. Вядома, што ў жанчыны падняўся ціск і ёй выклікалі на пасяджэнне хуткую дапамогу. 17 лістапада ёй прысудзілі два гады зняволення ў калоніі, Эму Антонаўну ўзялі пад варту ў зале суда. Яе змясцілі ў віцебскі СІЗА-2.

9 снежня 2022 г. МУС дадала палітзняволеную ў Пералік грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці.

16 снежня жанчыну перавялі з СІЗА-2 у гомельскую жаночую калонію № 4.

Жанчына цалкам адбыла тэрмін і 2 траўня 2023 г. выйшла на волю з гомельскай калоніі № 4.

Пенсіянерку Эму Сцепулёнак асудзілі да двух гадоў калоніі і ўзялі пад варту ў зале суда

Суддзя Ірына Яскевіч прызначыла палітзняволенай два гады пазбаўлення волі ва ўмовах агульнага рэжыму. Яе ўзялі пад варту ў зале суда. У зняволенні ёй засталося адбыць прыкладна чатыры месяцы.

"На пенсіі атрымала правы і села за руль". Гісторыя жыцця палітзняволенай Эмы Сцепулёнак

Жанчына не мае ў Беларусі ані сваякоў, ані сяброў, але неабыякавыя людзі не пакінулі яе сам-насам з рэпрэсіямі. Былая настаўніца захапляецца салідарнасцю беларусаў і дзякуе ўсім за падтрымку. У лістах Эма паўстае актыўны і цікаўным чалавекам: у маладосці яна вельмі любіла падарожнічаць і марыла стаць журналісткай, на пенсіі атрымала правы кіроўцы — "таму што было сумна", з гэтай жа прычыны працавала ў сельскай школе і дзіцячым садку.

Былая настаўніца сустрэне сваё 68-годдзе ў турме: распавядаем пра палітзняволеную пенсіянерку з Мёраў

Былыя калегі Эмы распавялі "Вясне" гісторыю жанчыны і заклікаюць усіх неабыякавых павіншаваць яе з Днём народзінаў з дапамогай паштовак, лістоў, тэлеграм і пасылак.